Iranda hıdjab kımegeni úshin soqqyǵa jyǵylǵan qyz qaıtys boldy

Iranda birneshe aı boıy jansaqtaý bóliminde jatqan 16 jastaǵy Armıta Geravand qaıtys boldy. Quqyq qorǵaýshylardyń aıtýynsha, ol hıdjab kımegeni úshin metroda ádet-ǵuryp dinı polıtsııasynyń qolyna túsken kezde aýyr jaraqat alǵan. Kazinform bul týraly VVS-ge silteme jasap habarlaıdy. 

«28 kún boıy qarqyndy terapııa bóliminde em alǵan tegerandyq stýdent Armıta Geravand bir saǵat buryn qaıtys boldy», - dep habarlady Iran Islam Respýblıkasynyń Jastar mınıstrligine qarasty Borna aqparat agenttigi.

Hengaw táýelsiz quqyq qorǵaý uıymynyń málimetinshe, metrodaǵy oqıǵa 3 qazan kúni bolǵan.

Ádet-ǵuryp dinı polıtsııasy ony platformada toqtatyp, basyna oramal taǵýyn talap etken. Qyz odan bas tartqanda, olar oǵan kúsh qoldanyp, saldarynan boıjetken jaqyn mańdaǵy áskerı gospıtalǵa jetkizildi. 

Bul eldiń bıligi qyz balaǵa jaraqattardy polıtsııa qyzmetkerleri salǵan degendi úzildi-kesildi joqqa shyǵaryp otyr. 

Komaǵa Armıta Geravand qazan aıynyń basynda túsken bolatyn. 

Kóptegen ırandyq Armıtanyń oqıǵasyn ótken jyly 22 jastaǵy Mahsa Amınıǵa qatysty bolǵan oqıǵamen salystyrdy. Ol da hıdjab kııý erejelerin saqtamaǵany úshin ustalǵan Polıtsııa kóliginde soqqyǵa jyǵylǵan Mahsa birneshe kúnnen keıin qaıtys boldy.

Onyń ólimi elde jappaı narazylyq týǵyzyp, patrýldiń ýaqytsha toqtaýyna sebep bolǵan edi. Mahsa Amını qaıtys bolǵannan keıin Iranda ereýilder kóp boldy, biraq oǵan búkil halyq jappaı qosyla qoıǵan joq.