Iranda COVID-19 vırýsyna qarsy vaktsınatsııa bastaldy

TEGERAN. IRNA-QazAqparat – Iranda el prezıdenti Hasan Rýhanıdyń jarlyǵymen seısenbi kúni COVID-19-ǵa qarsy reseılik «Spýtnık V» preparatymen vaktsınatsııalaý bastaldy, dep habarlaıdy qazAqparat IRNA agenttigine silteme jasap.

Tegerandaǵy Imam Homeını aýrýhanasynda ótken resmı jıynǵa Irannyń densaýlyq saqtaý mınıstri Saıd Namakı qatysty.

Iranda «Spýtnık V» reseılik vaktsınasyn birinshi bolyp alǵan adam eldiń densaýlyq saqtaý mınıstriniń uly boldy.

Densaýlyq saqtaý mınıstriniń aıtýynsha, birinshi kezeńde vaktsınany qarqyndy terapııa bólimshesiniń medıtsınalyq qyzmetkeri alady. Vaktsınatsııa tegin júrgiziledi.

4 aqpanda Tegeranǵa «Spýtnık V» vaktsınasynyń alǵashqy partııasy tıelgen ushaq kelgen bolatyn. Elge sondaı-aq, osy aıdyń ishinde AstraZeneca vaktsınasynyń 4,2 mln dozasy jetkiziledi. Sonymen qatar, Iran koronavırýsqa qarsy vaktsınany Qytaı men Úndistannan satyp alýdy josparlap otyr.