Iranda bılikke qarsy sherýge shyqqandarǵa raqymshylyq jasalmaq

TEGRAN. IRNA- QazAqparat – Irannyń joǵary kóshbasshy aıatolla Alı Hameneı sot bıliginiń myńdaǵan aıyptalýshynyń úkimin jeńildetý nemese raqymshylyq jasaý týraly usynysyna kelisti. Olar elde taıaýda bolǵan oqıǵa barysynda ustalǵan bolatyn, dep habarlaıdy QazAqparat IRNA-ǵa silteme jasap.

Bul sheshim Islam revolıýtsııasy jeńisiniń 44 jyldyǵy men Radjab aıy merekesine baılanysty qabyldanyp otyr. Shetelmen baılanysty bolyp, tyńshylyqpen aınalysqandar, adam óltirgender men qasaqana jaraqattaǵandar, memlekettik, áskerı jáne qoǵamdyq nysandardy qıratyp, órtegenderge raqymshylyq jasalmaıdy nemese úkimi jeńildemeıdi. «Anadolý» málimetinshe, raqymshylyq jasalatyndardyń naqty sany sot organdarynyń baǵalaýynan keıin belgili bolady.

Aıta ketsek, Iranda 17 qyrkúıekte 22 jastaǵy Mahsy Amınıdiń óliminen keıin aýqymdy narazylyqtar boldy. Boıjetkendi 13 qyrkúıekte polıtsııa «hıdjabty durys kımegeni» úshin ustaǵan jáne 16 qyrkúıekte qaıtys bolǵan.

Oǵan jaýap retinde Irannyń ondaǵan qalasynyń turǵyndary kóshege shyqty. Elde birneshe aıǵa sozylǵan narazylyq aktsııasy barysynda 10 myńnan astam adam ustaldy.

Oǵan qatysqan 1 myńnan astam adam sottaldy, tórteýi ólim jazasyna kesildi. Norvegııadaǵy Iran adam quqyqtary uıymy (IHR) 9 qańtarda jappaı narazylyq aktsııasy kezinde 481 adamnyń qaza tapqanyn málimdedi.

Foto: ru.irna.ir