Iranda bıyl 18 áıel darǵa asyldy

Sársenbi kúni Iranda kúıeýin óltirgeni úshin ólim jazasyna kesilip, on jylyn túrmede ótkizgen 29 jastaǵy Samıra Sabzıan darǵa asyldy. Ol – bıyl Iran bıligi sheshimimen ólim jazasyna kesilgen 18-shi áıel. Jaza Tegeran syrtyndaǵy Karadjada, «Gezel Hesar» túrmesinde oryndaldy, dep málimdedi Norvegııada ornalasqan Iran quqyq qorǵaý uıymy (IHR). Kazinform bul týraly VVS-ge silteme jasap habarlaıdy. 

Irandyq basylymdar bul týraly jazbady, bılik ókilderi de resmı rastaǵan joq.

Samıra 15 jasynda turmysqa shyǵyp, barǵan jerinde zorlyq-zombylyqqa jıi ushyraıtyn bolǵan, deıdi onyń týystary.

19 jasynda ol kúıeýin óltirdi degen aıyppen ustaldy. Sot birden ólim jazasyn keskenimen birqatar bıýrokratııalyq sebepterge baılanysty onyń oryndalýy keıinge shegerildi.

Tutqyndalǵan sátte onyń eki balasy (bireýi - sábı) bar edi. Olardy keıingi on jyl ishinde kórýge bir ret qana, darǵa aspas buryn jeltoqsanda ruqsat berdi.

Amnesty International quqyq qorǵaý uıymy men birqatar el úkimeti, onyń ishinde Ulybrıtanııa jas áıeldi aman alyp qalý úshin Iran bıligimen kelissóz júrgizýge tyrysty.

Quqyq qorǵaýshylardyń pikirinshe, keıingi kezderi Iranda ólim jazasyna kesilgender sany aıtarlyqtaı artqan. Bıyl qarashanyń ózinde 115 adam darǵa asyldy.

«Samıra Sabzıan – 2023 jyly darǵa asylǵan 18-shi áıel. Bul – sumdyq statıstıka», - deıdi quqyq qorǵaýshylar.

Ádette, ólim jazasyna kesilgen áıelder ata-anasynyń qoldaýynan da aıyrylady. Sebebi olar «otbasy abyroıyn» qorǵaýdy oılaıdy.