Iranda bala týý kórsetkishi tómendep barady
ASTANA. KAZINFORM – 1990–2010 jyldar aralyǵynda Iran halqynyń ósý qarqynyn báseńdetý maqsatynda halyq sanynyń ósimine baǵyttalǵan saıasat júrgizdi, dep habarlaıdy Anadoly.
Alaıda Iranda qabyldanǵan «Otbasy men jastardy qorǵaý týraly zańǵa» qaramastan, elde týý deńgeıi tómendea barady.
«Shark» gazetiniń Halyq jáne azamattyq ister basqarmasy men Irannyń statıstıka ortalyǵynyń derekteri negizinde daıyndaǵan málimetine sáıkes, 2021 jyly Iranda 1 mıllıon 114 myń sábı dúnıege kelgen. Al 2024 jyly bul kórsetkish 12 paıyzǵa tómendep, 979 myń 928 bala dúnıege kelgen. 2025 jyly týý sany aldyńǵy jylmen salystyrǵanda taǵy 7 paıyzǵa qysqaryp, shamamen 911 myń bolady dep boljanyp otyr.
Iran Ulttyq halyqty basqarý agenttiginiń bas hatshysy Merzıe Vahıd Destdjerdı «Shark» gazetine bergen suhbatynda týý kórsetkishiniń tómendeýine qatysty pikir bildirdi.
Onyń aıtýynsha, eldegi jastar ózderi betpe-bet kelip otyrǵan qıyndyqtarǵa baılanysty bala súıý máselesine asa saqtyqpen qaraıdy. Destdjerdı «Otbasy men jastardy qorǵaý týraly zańnyń» qabyldanýyna qaramastan, týý deńgeıiniń tómendeý úrdisi jalǵasyp jatqanyn, al ata-analar úshin bala dúnıege ákelý barǵan saıyn kúrdeli sheshimge aınalyp otyrǵanyn atap ótti.
Irannyń ishki ister mınıstri Iskender Mýmını de Iran halqynyń sany 75 jyldan keıin 40 mıllıon adamnan tómendeýi múmkin ekenin málimdedi.
Aıta keteıik, týý kórsetkishin arttyrýdy kózdeıtin «Otbasy men jastardy qorǵaý týraly zań» Iran parlamenti tarapynan 2021 jylǵy 16 qazanda qabyldanyp, Konstıtýtsııany qorǵaý keńesi bekitkennen keıin 2021 jylǵy 15 qarashada kúshine endi.
1990–2010 jyldary Iran halyq sanynyń tym jyldam ósýin tejeý úshin baqylaýly demografııalyq saıasat júrgizdi.
Alaıda 2012 jyly Irannyń rýhanı kóshbasshysy Álı Hameneıniń nusqaýymen bul saıasattan bas tartylyp, el halqynyń sanyn 150–200 mıllıon adamǵa deıin arttyrý baǵyty jarııalandy.
Aıta ketelik Iranda kedeılik ýshyǵyp baratyny týraly jazǵan edik.