Iranda áıelder men erlerdiń quqyǵy men múmkindikteri birdeı me - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Tashkentte Oral Tańsyqbaevtyń shyǵarmashylyq kórmesi ashyldy – ÓzA
Kórkem oıdyń kemeline aınalǵan Ózbekstan halyq sýretshisi, beıneleý óneriniń birtýar ókili Oral Tańsyqbaevtyń 120 jyldyǵyna arnalǵan mereıtoılyq kórme óz jumysyn bastady.
Bul týraly osy aptada «ÓzA» aqparat agenttigi habarlady.
Habarlamada aıtylǵandaı, Mádenıet pen ónerdi damytý qorynyń bastamasymen uıymdastyrylǵan kórmede kórermen nazaryna qylqalam sheberiniń 124 ǵajaıyp týyndysy usynylǵan. Onyń ishinde 106 shyǵarma I.V. Savıtskıı atyndaǵy Qaraqalpaqstan memlekettik óner mýzeıi, Ózbekstan memlekettik óner mýzeıi jáne Oral Tańsyqbaevtyń úı-mýzeıi qorlarynan alynsa, 18 týyndy - Qazaqstannyń maqtanyshy A.Qasteev atyndaǵy Memlekettik óner mýzeıiniń altyn qorynan arnaıy jetkizilgen.
Aıta keteıik, 1904–1974 jyldary ómir súrgen ulty qazaq Oral Tańsyqbaev - Ortalyq Azııa beıneleý mektebiniń negizin qalaǵan tulǵalardyń biri. Ol tek sýretshi emes, boıaýlar men jaryqtyń únin sóılete bilgen sheber kolorıst. «Ózbek Gogeni» atanǵan ańyz tulǵanyń «Kúres», «Kerýen», «Kıiz úı», «Ózbekstandaǵy kóktem» syndy týyndylary – kórkemdik pen ulttyq tanymnyń toǵysqan jarqyn úlgisi.
Onyń shyǵarmalary tek Tashkent pen Máskeýde ǵana emes, 1934 jyly AQSh-tyń Fıladelfııa qalasynda da jurtshylyqqa pash etilgeni - talant aýqymynyń jahandyq deńgeıin ańǵartady.
Alashankoý temirjol porty arqyly ótetin Qytaı-Eýropa (Orta Azııa) poıyzdarynyń sany 5000-nan asty – «Halyq gazeti»
1 qyrkúıekte Shyńjań Alashankoý stantsııasynan avtobólshekterge, elektrondy ónimderge, qajetti zattarǵa jáne basqa da taýarlarǵa toly Qytaı-Eýropa poıyzy Polshanyń Malashevıch tranzıttik ortalyǵyna qaraı jol tartty.
Bul týraly osy aptada Qytaıdyń «Halyq gazeti» basylymy habarlady.
Qytaılyq BAQ-tyń málimetinshe, Alashankoý temirjol portynan Qytaı-Eýropa baǵytynda (Orta Azııalyq) bıyl 5000-nan astam poıyz jóneltildi. Bul «Bir beldeý, bir joldy» joǵary sapada salýǵa jańa serpin berdi.
Sonymen qatar osy aptada «Halyq gazeti» basylymynda «Qytaıdyń ShYU-ǵa múshe basqa memleketterge salǵan túrli ınvestıtsııalarynyń kólemi 84 mıllıard AQSh dollarynan asty» degen aqparat jaryq kórdi.
Atalǵan BAQ-tyń 2025 jyldyń shildesindegi jaǵdaı boıynsha Qytaıdyń ShYU-ǵa múshe basqa memleketterdegi ártúrli ınvestıtsııalyq qorlarynyń kólemi 84 mıllıard AQSh dollarynan asty. Investıtsııalyq baǵyttar birtindep munaı-gaz, paıdaly qazbalar, qaıta óńdeý jáne jasaý ónerkásibi, ınfraqurylym qurylysy sııaqty dástúrli salalardan tsıfrlyq ekonomıka jáne jasyl damý syndy damyp kele jatqan salalarǵa deıin aýqymy keńeıe tústi.
«Bir beldeý, bir joldy» joǵary sapada birge salý jobasy jetekshiligimen Qytaı men ShYU-ǵa múshe memleketter arasyndaǵy ınvestıtsııalyq yntymaqtastyqtyń aýqymy keńeıdi. Sondaı-aq, óndiris pen jetkizý tizbegindegi yntymaqtastyq odan ári tereńdeı tústi. Qytaı barlyq múshe memlekettermen ınvestıtsııalardy qorǵaý týraly kelisim jasady. Bir jyl ishinde Reseımen, Qazaqstanmen jáne Tájikstanmen jańartylǵan ınvestıtsııalyq kelisimderge qol qoıdy.
Iranda áıelder men erlerdiń quqyqtary men múmkindikteri birdeı me? - Parstoday
Irandaǵy Islam revolıýtsııasynyń jeńisinen keıin keıbir Batys elderi ırandyq áıelderdiń qysymǵa ushyraǵanyn kórsetýge tyrysty. 1979 jyly Islam revolıýtsııasynyń jeńisimen Iran qoǵamyndaǵy áıelderdiń mártebesine degen kózqaras túbegeıli ózgeriske ushyrady. Keıbir adamdardyń oılaǵanyna qaramastan, Islam respýblıkasy júıesi áıelderdiń ártúrli salalarda bolýyna kedergi keltirmedi, Islam taǵylymdary men ımam Homeınıdiń (r.a.) ekpinine súıene otyryp, áıelderdiń ǵylymı, mádenı, áleýmettik, ekonomıkalyq jáne saıası salalarda ósip-órkendeýine jol ashty, dep jazdy ParsToday aqparat agenttigi.
ParsToday resmı jáne senimdi statıstıkaǵa toqtalǵan.
Irandyq BAQ-tyń dereginshe, Iran Islam Respýblıkasynyń negizin qalaýshy Imam Homeını (r.a.) qoǵamdaǵy erler men áıelderdiń quqyqtarynyń teńdigine árqashan basa nazar aýdarǵan. Atap aıtqanda, áıelder ıslam qoǵamynda erkin jáne olardyń ýnıversıtetterge, keńselerge nemese parlamentterge barýyna eshbir kedergi jasalmaıdy.
ParsToday aqparat agenttiginiń habarlaýynsha, Imam Homeını Islam kózqarasy boıynsha, keıbir jaǵdaılarda ártúrli ǵylymı, saıası, áleýmettik, ekonomıkalyq, halyqaralyq, mádenı jáne óner salalarynda jáne qyzmette mindetti bolyp tabylady. Alaıda fızıkalyq aıyrmashylyqtarǵa qaramastan, erler men áıelderdiń ekeýi teń qoǵamda quqyly.
Atap aıtqanda, bilim berý jáne oqytý, densaýlyq jáne gıgıena, jumyspen qamtý jáne kásipkerlik, sondaı-aq jumyspen qamtý jáne kásipkerlik salasynda ırandyq áıelder belsendi jáne tıimdi ról atqardy. Sonymen qatar saıası jáne basqarýshylyqqa qatysýda teń quqyly ekeni aıtylady.
Sırııa Asadtan keıingi Damý Qoryn iske qosty - TRT
Prezıdent Ahmed Shara Sırııany qalpyna keltirý úshin Sırııa Damý Qory negizgi qural bolatynyn aıtty, dep jazady «TRT».
Atalǵan BAQ-tyń keltirgen málimetterine súıensek, Sırııa Prezıdenti Ahmed Shara Sırııany qalpyna keltirýdiń mańyzdy quraly retinde qyzmet etetin Sırııa Damý Qoryn iske qosqan.
Bul týraly beısenbi kúni Damask qalasynda ótken qordyń ashylý saltanatynda Sırııanyń Arab Jańalyqtar Agenttigi (SANA) habarlady.
Túrkııa Radıo Televızııa portalynyń dereginshe, ál-Shara óz sózinde, biz búgin Sırııa Damý Qorynyń iske qosylǵanyn jarııalaý úshin jınaldyq. Osy qor arqyly sizderdi jomart qarajattaryńyzdy burynǵy rejım qıratqan eldi qaıta qurýǵa jáne olar órtep jibergen jerlerdi jasyl ári gúldengen memleketke aınaldyrýǵa shaqyramyz, – degen.
Shara qordyń óte ashyq bolatynyn jáne strategııalyq jobalarǵa jumsalǵan barlyq qarajattyń jarııa etiletinin aıtqan.
Aıta keteıik, qańtar aıynda Shara basqaratyn jańa ýaqytsha ákimshilik qurylǵan edi.
Roza Otynbaevanyń Aýǵanstandaǵy mıssııasy aıaqtaldy – Eurasia Today
BUU Bas hatshysynyń Aýǵanstan boıynsha arnaıy ókili Roza Otynbaevanyń mıssııasy aıaqtaldy.
Bul týraly osy aptada Eurasia Today aqparat agenttigi habarlady.
Eurasia Today-diń Toloý Nıýz agenttigine silteme jasap habarlaýy boıynsha juma, 5 qyrkúıekte Talıbannyń joǵary laýazymdy tulǵasy jáne Bosqyndar mınıstrliginiń basshysy Abdýl Kabırmen qoshtasý kezdesýin ótkizdi.
Keltirilgen derekterge súıensek, Otynbaeva kezdesýde gýmanıtarlyq kómektiń jalǵasýyna toqtalyp, BUU-nyń zilzaladan zardap shekken aımaqtarǵa 25 jumys tobyn jibergenin habarlady. Bul toptar halyqtyń jaǵdaıyn baǵalap, kómek taratý úderisin bastaıdy.
Sondaı-aq osy aptada Eurasia Today basylymynda «Irandyq ınvestorlar Aqtaýda zaýyt salýdy josparlap otyr» degen taqyryptaǵy aqparat jarııalandy.
Atalǵan BAQ-tyń dereginshe, Irandyq ınvestorlar Aqtaýdaǵy zaýyt qurylysyna 30 mıllıon dollar ınvestıtsııa salýdy josparlap otyr.
Eýrazııa Týdeıdiń habarlaýy boıynsha, tsement óndirý salasynda 40 jyldan astam jumys istep kele jatqan ırandyq kompanııa ókilderi “Aqtaý teńiz portynyń” arnaıy ekonomıkalyq aımaǵynda bolyp, onyń basqarma tóraǵasy Múbárák Tólegenovpen kezdesti.
Taraptar kezdesý barysynda Mańǵystaý oblysynda tsement zaýytyn salý boıynsha ınvestıtsııalyq jobany júzege asyrý jáne ekijaqty yntymaqtastyqty damytý máselelerin talqylaǵan.