Iranda avtobýs kópirden qulap ketip, ondaǵan adam qaza boldy
ASTANA. Qyrkúıektiń 16-sy. QazAqparat - Iranda Tegranǵa bara jatqan jolaýshylar avtobýsy jol apatyna ushyrady.
Mashına joldyń shetindegi qorshaýdy buzyp, kópirden qulap ketken. Apat saldarynan 29 adam qaza bolyp, taǵy 10 adam zardap shekti, dep habarlaıdy RBK agenttigi.
Oqıǵa Tegran men Save qalalarynyń arasynda oryn alǵan. Zardap shekkenderdiń bári aýrýhanaǵa jatqyzyldy.
Irannyń jol polıtsııasynyń aqparaty boıynsha, jol apatyna ábden sharshap kele jatqandyqtan, rýlge ıe bola almaı qalǵan avtobýstyń júrgizýshisi kináli. Taǵy bir aqparattar boıynsha, júrgizýshi rýlde uıyqtap qalǵan syńaıly.
Resmı málimetter boıynsha, byltyr Irannyń joldarynda jol-kólik oqıǵalarynyń saldarynan 23 myńdaı adam qaza tapqan. Iran jol apatyna ushyraý táýekeli joǵary elderdiń biri sanalady.
