Iranda áli kúnge qazaq mádenı ortalyǵy joq - Iran radıosyndaǵy qazaq redaktsııasynyń júrgizýshisi
ALMATY. Jeltoqsannyń 21-i. QazAqparat /Erlik Erjanuly/ - Iran qazaqtarynyń ana tilin saqtaýy turmysta qoldanylatyn sózderdiń aıasynda ǵana shektelýde.
Ony Iran radıosy qazaq redaktsııasynyń júrgizýshisi jáne aýdarmashysy Japarbaı Shatkam QazAqparat tilshisine bergen suhbatynda aıtty.
Iran elinde qazir 5 myńdaı qazaq bar. Olar negizinen Gorgan, Berditúrikmen, Dombat qalalarynda shoǵyrlanǵan. Qazaq tilindegi habarlardy Iran memlekettik teleradıo birlestiginiń 1 saǵattyq qazaqsha baǵdarlamasynan alady. Japarbaı Shatkamnyń aıtýynsha, qazir Irandaǵy qazaqtar kúndelikti turmystaǵy sózderdi ǵana qoldanǵandyqtan, ana tilin saqtaýy qıyndap bara jatyr. Buǵan sońǵy jyldary Qazaqstannan júıeli túrde merzimdi basylymdar aldyrýdyń úzilýi óz yqpalyn tıgizýde.
«Iran baspalarynan sońǵy jyldary osy elde oqyp júrgen qazaq jastarynyń parsy tilinen aýdarǵan 1-2 kitaby shyqty. Sondaı-aq Qazaqstan Elshiliginiń qoldaýymen Qajymuhambet Shatkan degen azamattyń qazaqshadan parsy tiline aýdarǵan Abaıdyń qara sózderi jaryq kórdi. Endi onyń 5 myńnan astam sózdi qamtyǵan úlken sózdigin Qazaqstandaǵy «Arys» baspasy shyǵarǵaly otyr. Bıyl sondaı-aq, Gúrdistan oblysynyń ortalyǵy sanalatyn Gorgan qalasynda Qazaqstan Elshiligi men Konsýldyǵy ashyldy. Endi onyń janynan qurylǵan kitaphanada túrli mádenı sharalar qolǵa alynady dep úmit artyp otyrmyz», deıdi Iran radıosy qazaq redaktsııasynyń júrgizýshisi jáne aýdarmashysy Japarbaı Shatkam.
