Iranda ákesi qyzyn kópshiliktiń kózinshe pyshaqtap, mert qyldy

ASTANA. KAZINFORM – Irannyń Islamshehr qalasynda ákesi 18 jastaǵy qyzy Fateme Soltanıdi sulýlyq salonynda jumys istegeni úshin pyshaqtap óltirdi, dep habarlaıdy IranWire.

Fateme áıelderge arnalǵan sulýlyq salonynda jasyryn jumys istegen, sebebi ákesiniń qaharynan qoryqqan. Qyzdyń sulýlyq salonynda jumys isteıtinin estigen ákesi birden sol jerge jetip barǵan. Qyz ákesin syrttan kórip, anasyna qońyraý shalyp, ne isteý kerektigin suraǵan.

Alaıda er adam salonyń ishine kirip, qyzyna birneshe ret pyshaq suqqan.

Kýágerlerdiń aıtýynsha, ol tipti qyzynyń shashynan ustap, basyn alýǵa árekettengen. Biraq kóshedegiler aıqaılaı bastaǵanda, qashyp ketken. Keıin áıeline habarlasyp: «Seni osy qaıǵymen birge qaldyrdym» degen.

Belgili bolǵandaı, ákesi únemi qysym kórsetkeni úshin Fateme anasymen birge bólek turǵan.

HRANA aqparat agenttiginiń málimetinshe, qylmysker ustalyp, oǵan qatysty is qozǵalǵan.
Iranda femıtsıd boıynsha naqty statıstıka jarııalanbaıdy, biraq mundaı jaǵdaılar jergilikti basylymdarda jıi jaryq kóredi.

Jergilikti BAQ ókilderi taratqan málimetterge súıensek, ótken jyly naýryzdan qyrkúıekke deıin týystary nemese jaqyndary qolynan 78 áıel qaza tapqan.

2023 jyly Shargh gazeti 2021-2023 jyldar aralyǵynda er adamdar kem degende óz otbasyndaǵy 165 áıeldi óltirgenin jazǵan. Onyń 27-si tek 2023 jyldyń alǵashqy úsh aıynda oryn alǵan. Qylmyskerler kóbinde «namysty» negizgi sebep retinde kórsetken.

- Bul sandar tek tirkelgen isterdi qamtıdy, al naqty kórsetkish budan áldeqaıda joǵary bolýy múmkin, delingen habarda.

Aıta keteıik, BUU 2024 jyly Iran 901 adamdy, onyń ishinde jeltoqsan aıynda 40-qa jýyq adamdy bir aptanyń ishinde ólim jazasyna keskenin málimdedi.

Sondaı-aq, Iran bıligi mýzykant áıel bolǵany úshin kontsertti toqtatqanyn jazdyq.