Iran jańa zymyran bazasyn tanystyrdy
ASTANA. KAZINFORM — Iran Islam revolıýtsııasy saqshylar korpýsynyń Aeroǵarysh kúshteri ballıstıkalyq jáne qanatty zymyrandar ornalasqan jańa zymyran bazasyn tanystyrdy. Bul týraly Kazinform agenttigi «Sınhýa» agenttigine silteme jasap habarlady.
Irannyń memlekettik teleradıokompanııasy IRIB málimetinshe, bazada qatty jáne suıyq otynmen jumys isteıtin ballıstıkalyq zymyrandar, sondaı-aq qanatty zymyrandar bar.
Iran tarapynyń málimdeýinshe, tanystyrylǵan zymyrandardyń keıbiri Izraılmen jáne AQSh-pen bolǵan 12 kúndik jáne 40 kúndik soǵystar kezinde qoldanylǵan.
Budan bólek, IRIB Iran zymyrandarynyń ushý qashyqtyǵyna qatysty shekteýlerdi alyp tastaǵanyn habarlady. Buǵan deıin, 7 qarashada Iran Islam revolıýtsııasy saqshylar korpýsy ókili Hoseın Mohebbı eldiń ballıstıkalyq zymyrandarynyń ushý qashyqtyǵyna qoıylǵan 2 myń shaqyrymdyq shekteý alynǵanyn málimdegen edi. Alaıda Irannyń budan da alys qashyqtyqqa usha alatyn zymyrandary bar ekeni resmı túrde rastalǵan joq.
Zymyran bazasyn tanystyrý rásiminde Iran Qarýly kúshteri Bas shtabynyń bastyǵy Álı Abdollahı el men onyń qarýly kúshteri qarsylastarynyń áskerı áleýeti men resýrstaryna qaramastan, sheshimderdi óz betinshe qabyldaıtynyn aıtty.
Al Iran Islam revolıýtsııasy saqshylar korpýsy Aeroǵarysh kúshteriniń qolbasshysy Seıed Madjıd Mýsavı qarsylastaryn Iranǵa qarsy áreket jasamaýǵa úndep, kez kelgen dushpandyq qadamǵa qatań túrde jaýap beriletinin eskertti.
Eske salaıyq, 2026 jylǵy 28 aqpanda Izraıl men AQSh Tegeranǵa jáne Irannyń ózge de qalalaryna birlesken soqqy jasady. Buǵan jaýap retinde Iran Izraıl men aımaqtaǵy amerıkalyq áskerı nysandarǵa birqatar zymyran jáne ushqyshsyz apparattarmen shabýyl jasady. Sondaı-aq Ormýz buǵazyndaǵy baqylaýyn kúsheıtti.
Eske salaıyq, buǵan deıin Tramp Iranǵa qarsy áskerı operatsııany qaıta bastaý ázirshe ekitalaı ekenin aıtqan edi.
