Iran ıadrolyq otyn almasý jónindegi kelissózdi qazir bastaýǵa daıyn - Iran Syrtqy ister mınıstri
ASTANA. Shildeniń 26-sy. QazAqparat - Iran mamyr aıynda ózi usynǵan ıadrolyq otynmen almasý jónindegi usynysty álemdik derjavalarmen egjeı-tegjeı talqylaýǵa dereý kirisýge ázir. Bul týraly Irannyń Syrtqy ister mınıstri Manýchehr Mottakı jeksenbi kúni Ystambulda málim etti,
dep habarlaıdy ITAR-TASS agenttigi.
Mınıstr bul málimdemeni Iran, Túrkııa jáne Brazılııa syrtqy saıasat vedomstvolary basshylarynyń konsýltatsııasynan keıin jasady. Irandyq derekkózderdiń habarlaýynsha, Ystambulda ótken úshjaqty kezdesýde «Tegrannyń ıadrolyq otynmen almasý jónindegi usynysynyń tóńiregindegi oqıǵalardyń damý barysy» talqylandy.
Aǵymdaǵy jyly mamyrdyń 17-sinde qabyldanǵan atalmysh ıran-túrik-brazılııa deklaratsııasy Tegrandaǵy zertteý reaktoryna qajetti 20 paıyzǵa deıin baıytylǵan ıadrolyq otynǵa almastyrý úshin Irannan Túrkııaǵa 1200 keli tómen baıytylǵan ýrandy -jetkizý máselesin qarastyrady. Mamyrdyń 24-inde Tegran MAGATE uıymy osy sharttardyń negizinde ýrandy almastyrýǵa ázir ekenin resmı habardar etken bolatyn. Irandyq derekkózderdiń habarlaýynsha, Vena tobynyń músheleri - Reseı, AQSh, Frantsııa elderi jáne MAGATE uıymy kelisim berse, Iran tómen baıytylǵan ýrandy aldaǵy aıdyń ishinde Túrkııaǵa jetkize bastaıdy.
Iran taraby, Tegrannyń bul málimdemesi Irannyń ıadrolyq baǵdarlama boıynsha «5 plıýs 1» (BUU Qaýipsizdik keńesiniń bes turaqty múshesi + Germanııa) tobymen aradaǵy kelissózin jalǵastyrýyna negiz bolýy kerek dep paıymdap otyr. Resmı Tegran sondaı-aq, bul kelissózderge Brazılııa men Túrkııany da qosqan jón dep sanaıdy.
