Iran ıadrolyq qarýsyzdaný máselesi boıynsha konferentsııa ótkizedi
ASTANA. Sáýirdiń 5-i. QazAqparat - Sáýir aıynda Iran ıadrolyq qarýsyzdaný máselesi boıynsha halyqaralyq konferentsııa ótkizedi. Bul týraly Beıjińde Qytaıdyń resmı tulǵalarymen kezdesý ótkizgen Irannyń ıadrolyq baǵdarlama jónindegi kelissóz júrgizýshi tobynyń jetekshisi Saııd Jalılı málim etti. S.Jalılıdiń aıtýynsha, Qytaı Halyq Respýblıkasy konferentsııaǵa qatysýǵa kelisimin berdi,
dep habarlaıdy VVS telekompanııasy.
Tegran, ıadrolyq baǵdarlamasyna keleshekte salynýy yqtımal sanktsııalarǵa jol bermes úshin, Qytaıdyń qoldaýyna ıe bolýǵa tyrysýda, deıdi sarapshylar.
Degenmen, Irannyń Prezıdenti Mahmud Ahmadınejad senbi kúni jasaǵan málimdemesinde, Birikken Ulttar Uıymy tarapynan Tegranǵa qatysty salynýy múmkin jańa sanktsııalardyń eldi odan beter nyǵaıtyp, onyń derbestigin arttyra túsetinin aıtty.
Al osynyń aldynda ǵana AQSh Prezıdenti Barak Obama, Irannyń ıadrolyq baǵdarlamasy boıynsha kelissóz júrgizýshi alty derjavanyń (Reseı, AQSh, Frantsııa, Germanııa, Ulybrıtanııa jáne Qytaı) Iranǵa qarsy jańa sanktsııalar toptamasyn ázirleıtinin málim etken bolatyn.
