Iran ıadrolyq qarýǵa qashanda qarsy bolǵan jáne bolashaqta da solaı bola bermek - Iran Elshisi
áýirdiń 13-i. QazAqparat /Aıdar Ospanalıev/ - «Iran ıadrolyq qarýǵa qashanda qarsy bolǵan jáne bolashaqta da solaı bola bermek», dep málimdedi búgin Irannyń Qazaqstandaǵy elshisi Qurban Seıfi.
Bul týraly ol búgin jýrnalıstermen bolǵan baspasóz máslıhatynda málim etti, dep habarlaıdy QazAqparat.
Onyń aıtýynsha, álemde ıadrolyq qarýdy taratpaý jónindegi kelisimdi júzege asyrý jumystary júrip jatyr. Atalmysh kelisimniń 6-shy bóliminde ıadrolyq qarýdy joıýǵa qatysty arnaıy bap ta bar. Soǵan qaramastan, atalmysh qujat talaptary tek júzege asyrylmaı ǵana qoıǵan joq. Kerisinshe, mundaı qarýdyń jańa túrleri jasalyp, qoldanysqa engizildi. «2005 jyly Iran Prezıdenti Birikken Ulttar Uıymy Bas assambleıasynyń otyrysyna qatysyp, óziniń ıadrolyq qarýdy joıý sharalaryn qoldaıtyndyǵyn bildirdi. Biz jaqynda Iran astanasynda ıadrolyq qarýsyzdaný máselesine arnalǵan úlken konferentsııa ótkizgeli otyrmyz. Biz ıadrolyq qarýdy taratpaý kelisimindegi mindetterdi oryndaýda eshqandaı alalaýshylyq bolmasa eken deımiz», dedi elshi.
