Iran ıadrolyq qarý jasaýǵa qabiletti - Ortalyq barlaý basqarmasynyń baıandamasy
ASTANA. Naýryzdyń 31-i. QazAqparat - Iran ıadrolyq qarý jasaýǵa qabiletti. Kongreske baıandama joldaǵan AQSh-tyń Ortalyq barlaý basqarmasy osyndaı qorytyndyǵa kelip otyr,
dep habarlaıdy ITAR-TASS agenttigi.
Onda «Irannyń, eger sáıkes sheshim qabyldaıtyndaı bolsa, ıadrolyq qarý óndirisi úshin paıdalanýǵa bolatyn óz tehnıkalyq múmkindikterin arttyrýdy jalǵastyra beretindigi» aıtylady. «Biraq, Tegrannyń ondaı sheshim qabyldaıtyn-qabyldamaıtynyn biz bilmeımiz», dep atap kórsetilgen.
Baıandamaǵa súıensek, Irannyń ýrandy baıytý jónindegi bas ortalyǵy Natanze qalasynda ótken jyldyń 11 aıynda shamamen 1,8 tonna tómen baıytylǵan ýran geksaftorıdi óndirilgen. Salystyrar bolsaq, 2008 jyly nebári jarty tonna ǵana óndirilgen. Barlaýshylardyń aıtýynsha, ýrandy baıytý úshin paıdalanylyp otyrǵan gaz tsentrıfýgalarynyń sany da byltyr 5 myńnan 8,7 myńǵa deıin jetkizilgen, degenmen olardyń tek 3,9 myńy ǵana jumys isteýde.
Ortalyq barlaý basqarmasynyń baıandamasynda sondaı-aq «Soltústik Koreıanyń da trotıl balamasymen «birneshe tonna» ıadrolyq oqtumsyq jasaý múmkindigine ıe ekeni» atap kórsetiledi.
