Iran: ıAdrolyq kelissózderde sanktsııalardyń toqtaýyna kepildik qajet
ASTANA. KAZINFORM — Iran ıadrolyq baǵdarlama boıynsha jalǵasyp jatqan kelissóz barysynda AQSh-tan sanktsııalardy alyp tastaýǵa resmı kepildik berýin talap etip otyr, dep habarlaıdy Kazinform tilshisi.
Bul týraly Tegeranda ótken baspasóz máslıhatynda Islam Respýblıkasy Syrtqy ister mınıstrliginiń resmı ókili Esmaıl Bagaı málimdedi.
— Biz sanktsııalardyń shynymen joıylatynyna kepildik alǵymyz keledi, — dep atap ótti dıplomat.
Ol «amerıkalyq tarap osy ýaqytqa deıin bul másele boıynsha naqty mindettemelerden jaltaryp kelgenin» qosyp ótti.
Bagaı sondaı-aq AQSh-tan usynys alý Irannyń avtomatty túrde kelisimin nemese ony qolaıly dep taný degendi bildirmeıtinin basa aıtyp, Iranǵa onyń negizgi talaptaryna qaıshy keletin sharttardy engizýdi mindetteý áreketterinen saqtandyrdy.
Ol bul málimdemeni BUU-nyń Atom energııasy jónindegi halyqaralyq agenttigi (MAGATE) Irannyń baıytylǵan ýran óndirisin 60%-ǵa arttyryp, ıadrolyq qarý jasaý úshin qajetti 90%-dyq shekke jaqyndaǵanyn anyqtaǵan baıandamasynan eki kún ótken soń jasady.
Bagaıdyń aıtýynsha, ýrandy baıytý quqyǵy Tegerannyń zańdy jáne logıkalyq negizdelgen «qyzyl syzyqtarynyń» biri bolyp qala beredi.
Jeksenbi kúni Iran SІM basshysy Abbas Arakchı eldiń Oman Syrtqy ister mınıstri Badr ál-Býsaıdı arqyly jetkizilgen AQSh usynysyna resmı jaýap daıyndap jatqanyn málimdedi.
Bagaı atap ótkendeı, jazbasha qujattar almasý — kelissózdegi standartty tájirıbe jáne usynystyń nusqasyn birinshi bolyp bergen Iran tarapy boldy.
Iran SІM ókili Tegeran «radıkaldy jáne maksımalıstik talaptardy» qamtıtyn mátinderdi qabyldamaıtynyn naqtylady.
Bul eki taraptyń sáýir aıynyń basynda jalǵasyp jatqan kelissózi bastalǵaly AQSh-tyń Iranǵa jasaǵan alǵashqy resmı usynysy boldy.
Kelissózge óz elderiniń atynan qatysqan Ýıtkoff pen Arakchı osy ýaqytqa deıin Irannyń ıadrolyq baǵdarlamasy boıynsha kelisimge kelýge baǵyttalǵan janama kelissózdiń bes raýndyn ótkizdi.
Buǵan deıin Irannyń ýran baıytýy jańa deńgeıge shyqqanyn jazǵan bolatynbyz.