Iran ıadrolyq kelisimge kelý úshin tıimdi usynystardy talqylaýǵa daıyn — dıplomat

ASTANA. KAZINFORM - Tegeranda BBC-ge bergen suhbatynda Iran Syrtqy ister mınıstriniń orynbasary Madjıd Taht-Ravanchı AQSh sanktsııalardy alý máselesin talqylaýǵa daıyn bolsa, Iran ıadrolyq kelisimge qol jetkizý úshin ymyraly nusqalardy qarastyrýǵa ázir ekenin málimdedi.

Bul týraly BBC habarlady.

Amerıkalyq resmı tulǵalar buǵan deıin birneshe ret kelissózderdiń sozylyp ketýine AQSh emes, Iran kináli ekenin aıtyp kelgen.

Senbi kúni AQSh Memlekettik hatshysy Marko Rýbıo prezıdent Donald Tramp kelisim jasasýdy quptaıtynyn, alaıda Iranmen bul «óte qıyn» ekenin atap ótti.

Degenmen, Taht-Ravanchı BBC-ge bergen suhbatynda endigi qadamy AQSh jasaý kerektigin aıtyp, Vashıngtonnyń shynymen kelisimge kelgisi keletinin dáleldeýi qajet ekenin jetkizdi.

- Eger olar shynaıy bolsa, kelisimge aparar joldamyz dep senemin, — dedi ol.

Tramp buǵan deıin Irannyń ıadrolyq baǵdarlamasyn shekteý jóninde mámilege qol jetkizilmese, soqqy jasaıtynyn málimdegen. Osy tusta AQSh aımaqqa áskerin toptastyryp jatqan.

Bul málimdemeler Iranda qańtar aıynda ótken jalpyulttyq úkimetke qarsy narazylyq sherýleriniń kúshpen basyp-janshylýynan keıin aıtyldy. Quqyq qorǵaý uıymdarynyń deregine sáıkes, sol oqıǵalar kezinde myńdaǵan adam qaza tapqan.

Aqpan aıynyń basynda AQSh pen Iran Omanda janama kelissózder ótkizdi.

Taht-Ravanchıdiń aıtýynsha, bul dıalog jalpy alǵanda oń baǵytta júrip jatyr, biraq naqty baǵa berýge áli erte. Ol kelissózderdiń ekinshi raýndy seısenbi kúni Jenevada ótetinin rastady. Tramp ta bul kezdesýlerdi pozıtıvti dep sıpattaǵan.

Irandyq dıplomat Tegerannyń ýrandy 60 paıyzǵa deıin baıytý jónindegi usynysyn kelisimge ázirliktiń dáleli retinde eske saldy. Qarýǵa jaqyn deńgeıdegi baıytý Islam Respýblıkasy ıadrolyq qarý jasaýǵa bet aldy degen kúdikti kúsheıtken. Alaıda Iran bul aıyptaýlardy únemi joqqa shyǵaryp keledi.

-Eger olar sanktsııalar alynatyn bolsa, biz baǵdarlamamyzǵa qatysty ózge de máselelerdi talqylaýǵa ázirmiz», — dedi Taht-Ravanchı.

Ol sanktsııalardyń barlyǵyn alyp tastaýdy kózdep otyr ma, joq onyń belgili bir bóligin alyp tastaý týraly sóz qozǵady ma, ol jaǵyn naqtylamady.

Irannyń 2015 jylǵy ıadrolyq kelisimde kózdelgendeı, el aýmaǵyndaǵy 400 kılogramnan asatyn joǵary baıytylǵan ýran qoryn syrtqa shyǵarý máselesine kelsek, dıplomat: «Kelissózder barysynda ne bolatynyn aıtýǵa ázirge erte», — dep jaýap berdi.

Buǵan deıin BAQ-ta Tegerannyń ýran baıytýdy ýaqytsha toqtatý jónindegi ózge de usynystary bolǵany habarlanǵan.

Osyǵan deıin Iran sanktsııalar tolyq alynǵan jaǵdaıda ýrandy baıytý deńgeıin tómendetetini týraly aıtylǵan bolatyn.