Iran ıadrolyq qarýdy taratpaý týraly sharttan shyǵýǵa daıyndalyp jatyr
ASTANA. KAZINFORM — Tegeranda Irannyń ıadrolyq saladaǵy halyqaralyq mindettemelerin qaıta qaraý máselesi talqylanyp jatyr, dep habarlaıdy Kazinform agenttiginiń menshikti tilshisi.
Jeksenbide Iran parlamentiniń bir top depýtaty eldiń ıAdrolyq qarýdy taratpaý týraly sharttan shyǵýyn kózdeıtin zań jobasyn parlament tóralqasyna engizdi.
Zań jobasy shuǵyl qaralatyn qujat retinde belgilendi. Alaıda ony ashyq talqylaýǵa shyǵarý úshin parlament spıkeri Mohammad Bager Galıbaftyń kelisimi qajet, dep habarlaıdy Tasnim agenttigi.
Depýtat Hosseın Álı Hadjıdelıganı jeksenbi kúngi parlament otyrysynda zań jobasy ázirlengenin aıtty. Onyń sózinshe, áskerı qaqtyǵys pen halyqaralyq qysym kúsheıgen tusta Irannyń kelisimge qatysýyn odan ári jalǵastyrýy el múddesine sáıkes kelmeıdi.
— Qazirgi jaǵdaıdy jáne qarsy taraptyń elimizge eki ret jasaǵan shabýylyn eskersek, ıAdrolyq qarýdy taratpaý týraly shartqa múshe bolyp qala berý bizge paıda ákelmeı, kerisinshe, shyǵynǵa ushyratyp otyr, — dedi depýtat.
Hosseın Álı Hadjıdelıganı bul bastamany Atom energııasy jónindegi halyqaralyq agenttik (AEHA) Basqarýshylar keńesiniń Iranǵa qatysty sheshimimen baılanystyrdy. Tegeran ınspektsııa talaptaryn saqtamady degen negizben Iran máselesin BUU Qaýipsizdik Keńesine jiberý týraly sheshim qabyldanǵan.
The chairman of the Iranian Parliament's National Security and Foreign Policy Commission says that the option of Iran’s withdrawal from the Non-Proliferation Treaty (NPT) is on the table.https://t.co/w2gDKBuimw
— Mehr News Agency (@MehrnewsCom) September 20, 2026
Buǵan deıin Iran Joǵary ulttyq qaýipsizdik keńesiniń hatshysy Mohsen Rezaı el basshylyǵynyń ıAdrolyq qarýdy taratpaý týraly sharttan shyǵý múmkindigin qarastyryp jatqanyn rastaǵan edi. Sonymen qatar ol Irannyń ıadrolyq doktrınasy ózgermegenin aıtyp, eldiń kelisimge odan ári qatysýy AQSh-tyń kelesi áreketterine baılanysty bolatynyn málimdedi.
Aıta keteıik, ıadrolyq qarýdy taratpaý týraly shart 1970 jyldan beri kúshinde. Onyń negizgi maqsaty — ıadrolyq qarýdyń taralýyna jol bermeý. Iran bul kelisimge ıadrolyq qarýy joq memleket retinde qatysady. Osyǵan baılanysty eldiń ıadrolyq nysandary Atom energııasy jónindegi halyqaralyq agenttiktiń kepildikteri men baqylaýynda. Tegeran ıadrolyq baǵdarlamasynyń tek beıbit maqsatty kózdeıtinin birneshe ret málimdegen.
2025 jyldyń maýsymynda Irannyń ıadrolyq nysandaryna jasalǵan soqqylarǵa deıin AEHA eldegi 60 paıyzǵa deıin baıytylǵan ýran qoryn shamamen 440 keli dep baǵalaǵan. Alaıda shabýyldardan keıin bul qordyń qaıda ornalasqany jáne qazirgi jaǵdaıy qandaı ekeni belgisiz.
Buǵan deıin Iran AQSh-pen soǵysty toqtatýdyń sharttaryn ataǵanyn habarlaǵan bolatynbyz.
Aqzat Jıenalına
