Iran ýrandy syrtta baıytý baǵdarlamasy týraly MAGATE-ni habardar etti
ASTANA. Mamyrdyń 25-i. QazAqparat - Iran ózindegi tómen baıytylǵan ýrandy shetelde baıytylǵan ónimge aıyrbastaý mindettemesi týraly hatty MAGATE uıymyna tabys etti.
Irannyń Al Alam memlekettik telearnasynyń habarlaýynsha, hatqa Atom energııasy jónindegi ulttyq agenttiktiń basshysy Álı Ákbar Salehı qol qoıǵan.
Ýrandy aıyrbastaý týraly úshjaqty kelisimge mamyrdyń 17-sinde Tegranda Iran, Túrkııa jáne Brazılııanyń arasynda ótken kezdesýde qol jetkizilgen bolatyn. Qujatqa sáıkes, aıyrbas Túrkııa aýmaǵynda jasalady. Kelisimniń aıasynda Iran 20 paıyzǵa deıin baıytylǵan 120 keli ıadrolyq otyn alý úshin Túrkııaǵa tómen baıytylǵan 1,2 tonna óz ýranyn jetkizýge daıyn.
