Iran ýrandy beıbit maqsatta baıytýdy jalǵastyrýy qajet — Abbas Aragchı

ASTANA. KAZINFORM — Iran radıofarmatsevtıkalyq preparattar men jańa ıadrolyq energetıkalyq reaktorlarǵa arnalǵan otyn óndirý úshin ýrandy beıbit maqsatta baıytýdy jalǵastyrýy tıis, dep jazady Sınhýa.

Bul týraly dúısenbi kúni eldiń syrtqy ister mınıstri Abbas Aragchı málimdedi.

— Aqyl-parasaty bar eshbir adam ómirdi saqtap qalýǵa múmkindik beretin beıbit maqsattaǵy otandyq tehnologııalarǵa salynǵan orasan ınvestıtsııanyń jemisinen, tek sheteldik qorqytyp-úrkitýler úshin bas tartpaıdy, — dep jazdy Aragchı X áleýmettik jelisindegi paraqshasynda.

Sońǵy aptalarda Iran ıadrolyq máselege qatysty dıplomatııalyq kúsh-jigerin jandandyrdy. Juma kúni tańerteń Iran, Frantsııa, Ulybrıtanııa jáne Germanııa (ıaǵnı, «eýropalyq úshtik») Túrkııanyń Ystanbul qalasynda ıadrolyq kelissózderdi qaıta jalǵastyrdy.

Dúısenbi kúni Iran Syrtqy ister mınıstrliginiń resmı ókili Esmaıl Bagaı aldaǵy eki aptada elge Halyqaralyq atom energııasy agenttiginiń (MAGATE) toby keletinin jáne Iran men MAGATE arasyndaǵy bolashaq yntymaqtastyqqa qatysty jospardyń usynylatynyn habarlady.

Budan buryn AQSh prezıdenti Donald Tramp Irannyń ıadrolyq nysandary qaıta iske qosylatyn bolsa, olardy «saýsaǵyn kóterip úlgergenshe joıyp jiberemin» dep málimdedi.