Iran ýran baıytý jónindegi jańa kásiporynnyń irgetasy qalanǵanyn jarııa etti
ASTANA. Sáýirdiń 20-sy. QazAqparat - Iran ýrandy baıytý jónindegi kezekti kásiporynnyń qurylysyn bastady. Bul týraly Iran basshysy Mahmud Ahmadınejadtyń kómekshisi Mojtaba Samare Hashemı habarlady.
Ol, memleket basshysynyń «jańa kásiporyn salynatyn oryndy bekitkenin» qýattady, dep habarlady Irannyń Press TV telearnasy. Prezıdent kómekshisiniń aıtýynsha, nysannyń qurylysyn aǵymdaǵy jyly aıaqtaý josparlanyp otyr.
Esterińizge sala keteıik, aqpannyń 9-ynda Iran 20 paıyzǵa deıin baıytylǵan ýran óndirisin bastaıtynyn jarııa etken bolatyn. Málimetterge súıensek, aqpannyń 9-11-i aralyǵynda Natanzedegi otyn baıytý jónindegi tájirıbelik qondyrǵyda ýran-235 otynyn 19,8 paıyz deńgeıine deıin baıytýǵa qol jetkizilgen. Bul protsess MAGATE ınspektorlardyń qatysýymen ótken. Iran buqaralyq aqparat quraldarynyń habarlaýynsha, medıtsınalyq maqsattaǵy ızotoptar óndiretin Tegrandaǵy zertteý reaktorynyń jumysyn qoldaý úshin Iran 20 paıyzǵa deıin baıytylǵan 120 keli ýranǵa muqtaj. Tegran reaktory qaterli isikke shaldyqqan naýqastardy emdeý úshin 20 túrli radıoızotoptar óndiredi jáne 20 paıyzǵa deıin baıytylǵan U-235 ýranymen jumys isteıdi.
