Iran úkimeti ekonomıkalyq qysymǵa baılanysty arnaıy jumys rejımine kóshti
ASTANA. KAZINFORM — Iran Islam Respýblıkasynyń úkimeti elge syrtqy ekonomıkalyq qysym men turaqsyzdyq faktorlaryna tıimdi qarsy turý úshin basqarý qurylymyn qaıta uıymdastyryp, arnaıy jumys rejımine kóshti, dep jazady IRNA.
Bul týraly Iran prezıdenti Masýd Pezeshkıan málimdedi.
— Atqarýshy bılik elde qalyptasqan erekshe jaǵdaıdaǵy ahýaldy baqylaý úshin jumys qurylymyn qaıta quryp, basqarýdyń jańa júıesin engizdi, — dep jazdy Iran prezıdenti óziniń X áleýmettik jelisindegi resmı paraqshasynda.
Pezeshkıannyń aıtýynsha, sońǵy aılarda Iran qarsylastarynyń elge qatysty strategııasy memlekettiń tirshiligin qamtamasyz etetin negizgi salalarǵa — energetıka, qarjy jáne logıstıka sektorlaryna baǵyttalǵan.
Prezıdenttiń sózinshe, bul áreketterdiń basty maqsaty — jasandy tapshylyq qalyptastyryp, azamattarǵa túsetin qarjylyq aýyrtpalyqty kúsheıtý arqyly qoǵamda narazylyq týǵyzý boldy.
— Iranǵa ekonomıkalyq qysym aıtarlyqtaı kúsheıdi. Alaıda halqymyzdyń tabandylyǵy jáne atqarýshy bıliktiń der kezinde qabyldaǵan daǵdarysqa qarsy sharalarynyń arqasynda qarsy taraptyń ekonomıkalyq soǵystaǵy negizgi josparlaryn júzege asyrýyna jol bermedik, — dep qorytyndylady memleket basshysy.
Osydan buryn habarlanǵandaı, Iran Ormýz buǵazyn ashý týraly usynysqa AQSh-tyń jaýabyn kútip otyr.
Sonymen qatar Iran AQSh-qa soǵysty toqtatýdyń jeti kúndik josparyn usynǵanyn jazǵan bolatynbyz.
