Iran úkimeti brıtandyq ıahtashylardy bosatty
ASTANA. Jeltoqsannyń 2-si. QazAqparat - «Bahreın koroldigi» ıahtasynyń bortynda bolǵan, ırandyq shekarashylar ustaǵan bes brıtandyq jeltoqsannyń 2-sinde bostandyqqa shyǵaryldy, dep habarlaıdy QazAqparat AFR saıtyna silteme jasap.
Tegrannyń málimdemesine saı, «Iran Islam Respýblıkasynyń aýmaqtyq sýlaryna zańsyz engen jáne Sırı aralynyń mańynda ustalǵan bes sheteldik birneshe saǵat buryn bosatyldy».
Pindar jeke-menshik komandasyna jatatyn «Bahreın koroldigi» ıahtasy halyqaralyq jarysqa qatysý úshin Bahreınnen Dýbaıǵa baǵyt alady. Qarashanyń 25-inde keme adasyp Iran sýlarynan bir-aq shyǵady jáne olardy shekara áskerleriniń kateri ustaıdy.
Bul oqıǵa Ulybrıtanııa jáne Iran qatynastarynyń tarıhyndaǵy osyndaı ekinshi kórinis bolyp otyr. 2007 jyly 15 brıtandyqty ırandyq shekarashylar osy sýlarda qolǵa túsirip, 13 kún boıy ustaǵan bolatyn.
