Iran túrmesinde Qazaqstan azamaty otyr
ASTANA. 23 sáýir. QazAqparat - Geologııalyq barlaý jáne ken óndirýmen aınalysatyn «Zar Kýh» atty birlesken qazaq-ıran kompanııasy Irannyń arnaıy qyzmetiniń nysanasyna ilikti.
Bul týraly qazaq basylymdarynyń biri jazdy.
Iran polıtsııasy osy fırmanyń bes birdeı qyzmetkerin ustapty. Olardyń úsheýi Qazaqstan azamaty bolsa, ekeýi - reseılik.
Tutqyndaýǵa ne sebep bolǵanyn Iran jaǵy ashyp aıtpaı otyr. Qazaqstan men Reseı elshilikteri Irannyń syrtqy ister mınıstrligine nota joldap, óz otandastarymen kezdestirýdi ótingen. Budan keıin Iran polıtsııasy elimizdiń eki azamatyn aıyp taqpastan bosatqan. Áıtse de, bireýi áli de abaqtyda. Elimizdiń syrtqy ister mınıstrliginiń baspasóz hatshysy Іlııas Omarovtyń habarlaýynsha, Irandaǵy qazaq Elshiligi qazir ony bosatý úshin jumys júrgizip jatyr.
