Iran Túrkııaǵa «zymyran shabýyldaryn» tekserý úshin birlesken top qurýdy usyndy
ASTANA. KAZINFORM — Tegeran Ankaramen birlesken komıssııa quryp, Irannyń Túrkııaǵa zymyran shabýyldaryn tergeýge daıyn, dep habarlaıdy Kazinform agenttiginiń Ankaradaǵy menshikti tilshisi.
Iran prezıdenti Masýd Pezeshkıan Túrkııa prezıdenti Rejep Taııp Erdoǵanmen telefon áńgimesinde Irannyń Túrkııa aýmaǵyna zymyran shabýyly týraly aıyptaýlardy tekserý úshin birlesken tergeý tobyn qurýdy usyndy. Tegeran aıyptaýlardy joqqa shyǵaryp, úshinshi elderdi kórshiler arasynda alaýyzdyq týdyrýǵa tyrysty dep aıyptady.
Túrkııanyń Yeni Shafak basylymynyń Iran prezıdenti ákimshiligine silteme jasap habarlaýynsha, Pezeshkıan aıyptaýlardy joqqa shyǵaryp, olardyń kórshiles memleketter arasyndaǵy qarym-qatynasty buzýǵa baǵyttalǵanyn málimdedi. Ol Tegerannyń Túrkııa aýmaǵyna eshqandaı zymyran shabýylyn jasamaǵanyn basa aıtty.
— Biz Iranǵa qarsy túrli elder men rejımder taratqan málimdemelerdi zertteý úshin birlesken top qurýǵa daıynbyz. Bul úgit-nasıhattyń dostas jáne baýyrlas eki memleket arasyndaǵy qarym-qatynasqa áser etýine jol bermeıdi, — dep málimdedi Iran prezıdenti.
Ol mundaı mehanızm Tegeran men Ankara arasyndaǵy strategııalyq seriktestikti saqtaýǵa jáne dezınformatsııanyń taralýyna jol bermeýge kómektesetinin atap ótti.
Eske salsaq, 4 naýryzda Túrkııa qorǵanys mınıstrligi Irannan baǵyttalǵan zymyrannyń joıylǵanyn habarlady.
Keıinnen Erdoǵan Irannan ushyrylǵan zymyrannyń joıylýyna qatysty pikir bildirdi.
Óz kezeginde NATO Túrkııaǵa jasalǵan zymyran shabýylynan keıin áskerı daıyndyǵyn kúsheıtetini málim boldy.
Osyǵan deıin Túrkııada Irannan ushyrylǵan ballıstıkalyq oq-dári joıylǵanyn jazdyq.
Sondaı-aq Iran zymyran soqqylarynyń sany men qýatyn arttyratyny habarlandy.