Iran Tramptyń qoqan-loqysyna qaramastan AQSh-pen kelissózdi jalǵastyratynyn málimdedi
ASTANA. KAZINFORM – Tegeran Vashıngtonǵa óz eskertýlerin deldal arqyly jetkizgenin málimdedi, dep habarlaıdy Kazinform agenttiginiń Taıaý Shyǵystaǵy menshikti tilshisi.
Iran Syrtqy ister mınıstrliginiń resmı ókili Esmaıl Bagaı dúısenbide ótken brıfıngte Tegeran amerıkalyq tarapqa AQSh-tyń soǵysty toqtatý týraly sońǵy usynysyna qatysty óz eskertýlerin jetkizgenin jáne pikir almasý pákistandyq deldal arqyly jalǵasyp jatqanyn málimdedi.
- Keshe habarlaǵanymyzdaı, biz óz alańdaýshylyǵymyzdy amerıkalyq tarapqa jetkizdik, - dedi Bagaı.
Ol baılanys Pákistan arqyly júrip jatqanyn qosyp ótti.
Tehran: US sent revised comments on Iran’s proposal despite public rejectionhttps://t.co/PzyJ1Ebonh pic.twitter.com/1HJtX5WFMx
— IRNA News Agency ☫ (@IrnaEnglish) May 18, 2026
Reuters-tiń pákistandyq derekkózge silteme jasaı otyryp habarlaýynsha, Islamabad AQSh-qa Irannyń kelisimge qatysty qaıta qaralǵan usynysyn jetkizgen. Derekkóz eki taraptyń «maqsattaryn únemi ózgertý» sebebimen kelispeýshilikterdi sheshýge ýaqyttyń azaıyp bara jatqanyn atap ótti.
Osy arada AQSh prezıdenti Donald Tramp Tegeranǵa qatysty rıtorıkasyn kúsheıtip otyr. Keshe Truth Social-daǵy jazbasynda ol Iran úshin «ýaqyt ótip bara jatqanyn» málimdep, Iran basshylyǵyn tez áreket etýge shaqyrdy.
- Iran úshin ýaqyt ótip jatyr, olar tez áreket etkeni jón, áıtpese olardan eshteńe qalmaıdy. Ýaqyt óte mańyzdy mánge ıe, - dep jazdy Tramp.
— Rapid Response 47 (@RapidResponse47) May 17, 2026
Axios málimetinshe, Tramp seısenbi kúni Aq úıdiń Jaǵdaıattyq ortalyǵynda Iranǵa qarsy yqtımal áskerı nusqalardy talqylaý úshin ulttyq qaýipsizdik jónindegi negizgi keńesshilermen kezdesý ótkizedi dep kútilip otyr.
Izraıldik BAQ Tramptyń áli de Iranmen kelisimge qol jetkizý múmkin dep sanaıtynyn jáne Tegerannyń aldaǵy kúnderi jańartylǵan usynys jasaýyn kútetinin habarlady. Bul rette ol kelissózdiń merzimin belgileýden bas tartty, biraq Iran AQSh-tyń ıadrolyq baǵdarlamasyna qatysty talaptaryn oryndamaǵan jaǵdaıda áskerı áreketterdi kúsheıtemiz dep qorqytty.
- Biz mámilege qol jetkizgimiz keledi. Olar biz qalaǵan jerde emes. Olardyń sol jerge jetýine týra keledi, áıtpese qatty soqqyǵa jyǵylady, al olar muny qalamaıdy, - dep keltiredi basylym Tramptyń sózin.
Trump tells Axios "clock is ticking" for Iran and warns of more massive U.S. military attack https://t.co/sVBgMH09xf
— Axios (@axios) May 17, 2026
BAQ: AQSh pen Izraıl Iranǵa qarsy soqqylardy qaıta bastaýǵa daıyndalyp jatyr
Izraıl premer-mınıstri Bınıamın Netanıahý jeksenbi kúni AQSh prezıdenti Donald Tramppen telefon arqyly sóılesti. Osydan keıin ol qaýipsizdik máselesine arnalǵan jabyq keńes ótkizdi. Izraıldik BAQ málimetinshe, jıynda Iranmen soǵys jáne áskerı áreketterdi qaıta bastaý múmkindigi talqylanǵan.
Buǵan deıin The New York Times AQSh pen Izraıldiń Iranǵa qarsy áskerı operatsııany qaıta bastaý yqtımaldyǵyna daıyndalyp jatqanyn habarlaǵan edi.
Basylym dereginshe, qarastyrylyp jatqan nusqalardyń qatarynda amerıkalyq arnaıy jasaqtardy jasyrylǵan ıadrolyq materıaldardy izdeýge jiberý jospary bar. Onyń ishinde Isfahandaǵy nysandar da atalady. Sonymen birge Irannyń áskerı jáne ınfraqurylymdyq obektilerine soqqyny kúsheıtý máselesi qaralyp jatyr.
Qazir aımaqta AQSh-tyń shamamen 5 myń teńiz jaıaý áskeri men 82-shi áýe-desant dıvızııasynyń eki myńǵa jýyq sarbazy ornalasqan. Olar yqtımal buıryqty kútip otyr. Sondaı-aq Pentagon Irannyń negizgi munaı habtarynyń biri sanalatyn Hark aralyn baqylaýǵa alý stsenarııin de qarastyrǵan. Alaıda bul jospar adam shyǵyny kóp bolýy múmkin degen qaýipke baılanysty kúrdeli nusqa retinde baǵalanyp otyr.
U.S. Marines from the 31st Marine Expeditionary Unit rappel out of an MH-60S Sea Hawk during scheduled training aboard USS Tripoli (LHA 7). Tripoli is one of more than 20 warships supporting the U.S. blockade against Iran. Since the start of the blockade, CENTCOM forces have… pic.twitter.com/07ERp8RVB1
— U.S. Central Command (@CENTCOM) May 14, 2026
5 mamyrdaǵy brıfıngte AQSh Qarýly kúshteri shtab bastyqtary birikken komıtetiniń tóraǵasy Den Keın Iranǵa qarsy iri áskerı operatsııany qaıta bastaýǵa 50 myńnan astam amerıkalyq áskerı qyzmetker daıyn turǵanyn málimdegen. Onyń aıtýynsha, eki ushaq tasymaldaýshy keme, onnan astam esmınets pen áskerı ushaqtar da tolyq daıyndyq rejıminde.
Buǵan deıin Vashıngton Tegeranǵa daǵdarysty retteýge arnalǵan 14 tarmaqtan turatyn jospar usynǵan. Qujatta Irannyń ıadrolyq qarýdan bas tartý, ýran baıytýdy 12 jylǵa toqtatý jáne 60 paıyzǵa deıin baıytylǵan shamamen 440 keli ýrandy ótkizý sııaqty máseleler qarastyrylǵan. Óz kezeginde AQSh sanktsııalardy kezeń-kezeńimen alyp tastaýǵa jáne Iran aktıvterin buǵattan shyǵarýǵa daıyn ekeni aıtylǵan.
AQSh pen Izraıldiń Iranǵa qarsy soǵysy 28 aqpanda bastalǵan.
Pákistannyń araǵaıyndyǵymen sáýir aıynda qol jetkizilgen bitim ázirge turaqsyz. Taraptar bir-birine aıyp taǵyp keledi. Sonymen qatar AQSh-tyń Iran porttaryna qoıǵan shekteýleri men Ormýz buǵazyndaǵy kemelerge jasalǵan shabýyldar jaǵdaıdy ýshyqtyryp otyr.
Osyǵan deıin AQSh-tyń Iranǵa ıadrolyq kelissózderdi qaıta bastaý úshin birneshe shart qoıǵany týraly jazdyq.
