Iran Trampqa ıadrolyq qarý máselesi boıynsha kelissózder júrgizýden bas tartty

ASTANA. KAZINFORM - Irannyń joǵarǵy basshysy aıatolla Álı Hameneı AQSh prezıdenti Donald Tramptyń Irannyń ıadrolyq baǵdarlamasy jónindegi kelissózderdi qaıta bastaý týraly usynysynan bas tartty, dep habarlaıdy DW.

Memlekettik Irna aqparat agenttiginiń habarlaýynsha, aıatolla Álı Hameneı Tegeranda sheneýnikter men áskerı qyzmetkerler aldynda sóz sóıledi. Ol AQSh-ty tikeleı atamasa da, «agressıvti» úkimetterdi «qorqytyp-úrkitti» dep aıyptap, Irannyń «eshqashan olardyń úmitin aqtamaıtynyn» málimdedi.

— Olar qoǵamda «nege biz kelissózderge daıyn ekenimizdi bildirsek te, Iran kelissóz júrgizýden bas tartyp otyr?» degen kúmán týǵyzýǵa tyrysady. Biraq olardyń shynaıy maqsaty — dıalog emes, ústemdik ornatý jáne óz ustanymdaryn májbúrlep tańý (olardyń ustanymy - red. DW), — dedi Hameneı.

Irannyń Joǵarǵy basshysynyń aıtýynsha, másele tek ıadrolyq baǵdarlamada ǵana emes. AQSh Irannyń qorǵanys jáne zymyrandyq baǵdarlamalaryna, sondaı-aq onyń halyqaralyq baılanystaryna qatysty óz talaptaryn qoıyp otyr.

Hameneı kelissózderden bas tartqanymen, Irannyń ıadrolyq baǵdarlamasy «qaı jerde bolsa da» talqylanýy múmkin ekenin aıtty, biraq naqty málimet bermedi.

Buǵan deıin Donald Tramp Irandy ıadrolyq qarý jóninde kelissózderge shaqyrǵan bolatyn.

Aıta keteıik, Tramp Iranǵa «maksımaldy qysym» kórsetýge baǵyttalǵan memorandýmǵa qol qoıǵan edi. Bul qujat Tegerannyń ıadrolyq qarý jasaý múmkindiginen aıyrý maqsatynda Iran munaı eksportynyń qysqarýyn da qamtıdy.