Iran teńiz blokadasyn toqtatyp, AQSh kúshterin shyǵarýdy talap etti
ASTANA. KAZINFORM — Tegeran Vashıngtonmen júrgizilip jatqan kelissózder aıasynda negizgi talaptaryn qaıta jarııalady, dep habarlaıdy Kazinform agenttiginiń menshikti tilshisi.
Iran Syrtqy ister mınıstriniń quqyqtyq jáne halyqaralyq máseleler jónindegi orynbasary Kazem Garıbabadı seısenbi kúni parlamenttiń ulttyq qaýipsizdik jáne syrtqy saıasat komıteti múshelerine AQSh-pen kelissózderdiń barysy men Iran tarapynyń ustanymy týraly baıandama jasady. Bul týraly IRNA agenttigi habarlady.
Otyrys barysynda mınıstr Tegerannyń «qaǵıdattary men ulttyq múddelerine», sonyń ishinde ıadrolyq baǵdarlamany beıbit maqsatta damytý jáne ýran baıytý quqyǵyna adal bolyp qala beretinin atap ótti.
Tegerannyń usynystar paketinde «barlyq maıdandaǵy» áskerı is-qımyldardy toqtatý, sonyń ishinde Lıvandaǵy qaqtyǵystardy doǵarý, AQSh-tyń teńiz blokadasyn alyp tastaý, Irannyń buǵattalǵan aktıvterin bosatý, barlyq birjaqty sanktsııalar men BUU Qaýipsizdik Keńesiniń qararlaryn joıý, sondaı-aq Islam respýblıkasy mańyndaǵy aımaqtardan amerıkalyq kúshterdi shyǵarý talaptary qamtylǵan.
Sonymen qatar Iran tarapy AQSh pen Izraılmen bolǵan sońǵy soǵys kezinde keltirilgen shyǵyndy óteýdi de talap etip otyr. Bul qarajat eldi qalpyna keltirýge jumsalmaq.
Otyrys barysynda parlament depýtattary Syrtqy ister mınıstrligi ókilderine kelissózder men óńirlik ahýalǵa qatysty suraqtar qoıdy. Sondaı-aq Úndistanda ótken BRIKS elderi syrtqy ister mınıstrleriniń kezdesýiniń qorytyndysy men Pákistan ishki ister mınıstriniń Tegeranǵa sapary talqylandy.
Buǵan deıin Donald Tramp Tegerannan jańa usynys alǵannan keıin Iranǵa qarsy soqqylardy qaıta bastaýdy keıinge qaldyrǵanyn aıtyp, Irannyń ıadrolyq baǵdarlamasy boıynsha kelisimge qol jetkizýge úmit bildirgen edi.
BAQ málimetinshe, Iran jarııalaǵan sharttar Tramp buǵan deıin «qabyldaýǵa kelmeıtin talaptar» dep ataǵan burynǵy talaptardan aıtarlyqtaı erekshelenbeıdi.
Osyǵan deıin Iran Ormýz buǵazyn basqarýǵa arnalǵan jańa organnyń qurylatynyn jarııalady.
