Iran sońǵy ondaǵan jyldaǵy eń aýyr sý daǵdarysymen kúresip jatyr

ASTANA. KAZINFORM — Iran bıligi 10 mıllıonnan astam turǵyny bar Tegeran qalasy eldi qamtyǵan qýańshylyq jalǵasa berse, jaqyn arada ómir súrýge jaramsyz bolýy múmkin dep eskertti. Bul týraly AZERTADJ habarlady.

Reuters málim etkendeı, Iran Prezıdenti Masýd Pezeshkııannyń aıtýynsha, eger jeltoqsan aıyna deıin jaýyn-shashyn bolmasa, úkimet Tegeranda sýdy normalaý sharalaryn engizýge májbúr bolady.

— Eger biz sýdy normalasaq ta, jańbyr jaýmaı qoısa — onda múlde sý bolmaıdy. Ondaı jaǵdaıda Tegeran turǵyndaryn evakýatsııalaýǵa týra keledi, — dedi Prezıdent Pezeshkııan 6 qarashada.

Úkimet ókilderi qazirgi sý tapshylyǵyn burynǵy basqarý saıasatymen, klımattyń ózgerýimen jáne sýdy shamadan tys tutynýmen túsindiredi.

Iran Sý zertteýleri ınstıtýtynyń basshysy Mohammadreza Kavıanpýrdyń málimetinshe, ótken jyly eldegi jaýyn-shashyn mólsheri sońǵy 57 jyldaǵy ortasha deńgeıden 40% tómen bolǵan. Sarapshylardyń boljamynsha, qýańshylyq kem degende jeltoqsannyń sońyna deıin jalǵasady.

Tegeran tolyǵymen qaladan tys ornalasqan ózenderden sý alatyn bes sý qoımasyna táýeldi. Alaıda, sońǵy ýaqytta sý kelýi kúrt azaıǵan. Tegeran aımaqtyq sý kompanııasynyń basshysy Behzad Parsa ótken aptada sý deńgeıi ótken jylmen salystyrǵanda 43%-ǵa tómendegenin aıtty. Amır-Kabır sý qoımasy qazirgi tańda bar bolǵany 14 mln tekshe metr sýdy ustap tur, bul onyń jalpy syıymdylyǵynyń 8%-yn ǵana quraıdy.

Onyń aıtýynsha, Tegerannyń sý qoımalary buryn shamamen 500 mln tekshe metr sý ustaı alatyn bolsa, qazir tek 250 mln tekshe metrge jetip otyr — bul eki ese az. Qazirgi tutyný deńgeıi saqtalsa, sý qory eki aptanyń ishinde taýsylýy múmkin.

Daǵdarys tek Tegeranmen shektelmeı otyr. El boıynsha 19 iri sý qoımasy — Irandaǵy barlyq sý qoımalarynyń shamamen 10%-y — tolyǵymen keýip qalǵan. 4 mıllıon halqy bar ekinshi iri qala Meshhedte sý qory 3%-dan tómen deńgeıge túsken.

Bılik klımattyń ózgerýi sýdyń jetispeýshiligin kúsheıtip otyr deıdi — temperatýranyń kóterilýi býlanýdy jáne jer asty sýlarynyń azaıýyn jyldamdatqan.

Qazir úkimet qalǵan sýdy saqtaý úshin ýaqytsha sharalar qabyldaýda — keıbir aýdandarda sý qysymy tómendetilip, basqa sý qoımalarynan Tegeranǵa sý tasymaldanyp jatyr.

Osydan buryn Irannyń Shıraz qalasynda suıytylǵan gaz quıý zaýytynda jarylys bolǵany anyqtaldy.