Iran SІM basshysy Islamabadqa AQSh-pen kelissózder úshin kelýi múmkin
ASTANA. KAZINFORM — Abbas Aragchı juma kúni keshke shaǵyn delegatsııamen Islamabad qalasyna kelýi múmkin. Taraptar Pákistannyń deldaldyǵymen kelissózderdiń jańa kezeńin ótkizýi múmkin, dep habarlaıdy Kazinform agenttiginiń Taıaý Shyǵystaǵy menshikti tilshisi.
Bul sapar aıasynda AQSh tarapymen kelissózderdiń jańa kezeńi ótýi yqtımal, dep habarlaıdy Reuters agenttigi Pákistan úkimetindegi derekkózge silteme jasap.
Derekkózdiń aıtýynsha, beıbit kelissózderdiń ótý yqtımaldyǵy joǵary. Sonymen qatar, logıstıka jáne qaýipsizdik máselelerine jaýapty amerıkalyq top kezdesý daıyndyǵy úshin Pákistan astanasyna aldyn ala kelgen.
Osyǵan uqsas aqparatty Al Arabiya da Pákistan úkimetindegi derekkózge silteme jasap taratty.
🔴 BREAKING: A Pakistani government source tells Al Arabiya that Iranian FM Abbas Araghchi may arrive in Islamabad tonight. pic.twitter.com/qnHLexrLE7
— Al Arabiya English (@AlArabiya_Eng) April 24, 2026
Buǵan deıin pákistandyq deldaldarmen ótken konsýltatsııalardan keıin taraptar Islamabadta kelissózderdiń ekinshi kezeńin ótkizý múmkindigin qarastyryp jatqany habarlanǵan edi. Bul bastama beıbit protsestiń bolashaǵyna qatysty belgisizdik saqtalyp otyrǵan kezeńde kóterilip otyr.
Kútilip otyrǵan sapar aldynda Aragchı Asım Mýnır jáne Ishak Darmen telefon arqyly sóılesken. Pákistan Syrtqy ister mınıstrligi málimetinshe, taraptar óńirlik ahýal, atysty toqtatý jáne AQSh pen Iran arasyndaǵy dıplomatııalyq baılanystar máselelerin talqylaǵan.
Ishak Dar turaqty dıalogtyń mańyzyn atap ótse, Abbas Aragchı Pákistannyń kelissózderge járdemdesýdegi «dáıekti ári syndarly rólin» joǵary baǵalaǵan.
Sondaı-aq, apta ishinde Islamabadqa baılanys quraldary, kólik, qaýipsizdik qyzmetkerleri men tehnıkalyq personaldy jetkizý úshin keminde toǵyz amerıkalyq ushaq kelgeni habarlandy.
BUU Iran blokada aıaqtalǵannan keıin kelissózderge daıyn ekenin málimdedi.
