Iran SІM basshysy elde ýrandy baıytý protsesiniń toqtatylǵanyn málimdedi
ASTANA. KAZINFORM – AQSh-tyń ıadrolyq nysandarǵa jasaǵan soqqysynan keıin Irandaǵy ýrandy baıytý áli bastalǵan joq, alaıda Tegeran bul protsesti ulttyq maqtanysh dep sanap, odan bas tartqysy kelmeıdi. Bul týraly Islam respýblıkasy SІM basshysy Abbas Aragchı málimdedi, dep habarlaıdy TASS aqparat agenttigi.
- Qazir ol toqtatylǵan, óıtkeni eleýli zalal keltirildi. Bul rette ol ǵalymdarymyzdyń jetistigi bolǵan soń, baıytýdan bas tartpaıtynymyz anyq, onyń ústine bul endi ulttyq maqtanysh máselesi, - dedi mınıstr Fox News-ke bergen suhbatynda.
Mınıstr Irannyń atom energııasy uıymy qazirgi ýaqytta ıadrolyq nysandarǵa keltirilgen shyǵyn kólemi men baıytylǵan ýran qoımalarynyń jaǵdaıyn baǵalap otyrǵanyn qosyp ótti.
Buǵan deıin NBC News telearnasy egjeı-tegjeıli aqparat keltirmesten AQSh-soqqylary saldarynan Irannyń bir ǵana ıadrolyq nysany zaqymdanǵanyn habarlaǵan. Aq úı bul aqparatty joqqa shyǵardy.
CNN telekompanııasynyń 24 maýsymda habarlaǵanyndaı, amerıkalyq barlaý qaýymdastyǵy Iranǵa jasalǵan soqqylar respýblıkanyń ıadrolyq baǵdarlamasynyń negizgi quramdas bólikterin joıǵan joq dep esepteıdi.
AQSh barlaý qyzmetiniń aldyn ala baǵalaýy boıynsha, shabýyl Tegerannyń ıadrolyq bombaǵa ıe bolýyn birneshe aıǵa ǵana keshiktirgen bolýy múmkin. Bul AQSh Qorǵanys mınıstrligi barlaý basqarmasynyń jasaǵan tujyrymy. Bul rette ol osyndaı qorytyndyǵa onyń dáldigine senimniń tómen dárejesimen kelgenin naqtylady.
25 maýsymda AQSh prezıdenti Donald Tramp pen qorǵanys mınıstri Pıt Hegset sonyń ishinde AQSh barlaý qyzmetiniń jańa derekterine silteme jasaı otyryp 22 maýsymǵa qaraǵan túni soqqyǵa jyǵylǵan Irannyń Isfahan, Natanz jáne Fordodaǵy ıadrolyq nysandarynyń jer betinen is júzinde joıylǵanyna senim bildirdi.
Budan bólek, Aq úı Vashıngtonda bar aqparatqa sáıkes Iran bul keshenderden ıadrolyq materıaldardy aldyn ala shyǵara almaǵanyna sendirdi.
Iran men «eýroúshtik» 25 shildede ıadrolyq kelissóz ótkizedi.