Iran SІM basshysy Aýstralııa premer-mınıstrin «álsiz saıasatker» dep atady

ASTANA. KAZINFORM — Tegeran Aýstralııa úkimetiniń ırandyq dıplomattardy elden shyǵarýǵa qatysty sheshimine pikir bildirdi.

Irannyń syrtqy ister mınıstri Abbas Arakchı Kanberranyń aıyptaýlaryn múldem negizsiz dep atady. Bul týraly ol X áleýmettik jelisinde jazdy.

— Iran — álemdegi eń kóne evreı qaýymdarynyń biri turatyn el. Munda ondaǵan sınagoga bar. Biz óz elimizde olardy qorǵaý úshin bar kúshimizdi salyp jatqanda, Aýstralııadaǵy mundaı oryndarǵa shabýyl jasadyq degen aıyptaýlar — múlde qısynsyz, — dedi Arakchı.

Mınıstr sonymen qatar Aýstralııa premer-mınıstrin «álsiz saıasatker» dep atady.

Buǵan deıin Aýstralııa premer-mınıstri Iran elshisi men taǵy úsh dıplomatty elden shyǵarý týraly sheshim qabyldaǵanyn málimdegen bolatyn. Sonymen qatar Aýstralııanyń Tegerandaǵy elshiliginiń jumysy toqtatyldy.

Aýstralııanyń qaýipsizdik jáne barlaý qyzmetiniń derekterine sáıkes, ótken jyly Melbýrndaǵy sınagoga men Sıdneıdegi meıramhanaǵa jasalǵan shabýyldardyń artynda Iran turǵan.