Iran SІM basshysy AQSh-pen ıadrolyq kelissózderdiń sátti ótetinine senim bildirdi

ASTANA. KAZINFORM – AQSh tarapynan soqqy jasaý qaýpine qaramastan, Tegeran Vashıngtonmen ıadrolyq baǵdarlama boıynsha kelisimge qol jetkizý múmkin ekenine senimdi. Bul týraly Irannyń syrtqy ister mınıstri Abbas Arakchı málimdedi, dep habarlaıdy Anadolu.

– Ókinishke qaraı, biz AQSh-ty kelissózderdegi seriktes retinde senimdi tarap dep qabyldaı almaımyz. Alaıda óńirdegi dostas elder arqyly habar almasý kelissózderdiń nátıjeli ótýine yqpal etip otyr, – dedi ol CNN telearnasyna bergen suhbatynda.

Abbas Arakchıdiń aıtýynsha, AQSh-pen tikeleı dıalog tek senimniń eń tómengi deńgeıi qalpyna keltirilgen jaǵdaıda ǵana múmkin.

– Tikeleı nemese janama kelissózder – dıalog júrgizýdiń bir formasy ǵana. Eń bastysy, kelissózderdiń mazmuny. Bizge senim qajet. Tolyq senim eshqashan bolmaýy da múmkin, biraq eń bolmaǵanda mınımaldy deńgeı qajet, – dedi mınıstr.

Ol sondaı-aq yqtımal áskerı qaqtyǵysqa qatysty pikir bildirdi.

– Soǵys mindetti emes, ony boldyrmaýǵa bolady. Biz oǵan tolyq daıynbyz, tipti on eki kúndik soǵys kezeńindegiden de jaqsy daıyndalǵanbyz. Alaıda daıyn bolý – soǵysty qalaý degen sóz emes. Bizdiń maqsatymyz – soǵystyń aldyn alý, – dep túsindirdi Abbas Arakchı.

Buǵan deıin AQSh prezıdenti Donald Tramp Iranmen kelisim jasasýǵa berilgen ýaqyttyń taýsylyp bara jatqanyn aıtyp, AQSh-tyń kelesi yqtımal soqqysy 2025 jylǵy maýsymda jasalǵan shabýyldan áldeqaıda qatań bolatynyn eskertken edi.