Iran Syrtqy ister mınıstri Hameneıdiń arnaıy joldaýymen Máskeýge keldi
ASTANA.KAZINFORM - Abbas Arakchı Máskeýge resmı saparmen keldi. Ol reseılik áriptesimen kelissóz júrgizip, Iran basshysynyń reseılik áriptesine jazbasha joldaýyn jetkizedi, dep habarlaıdy Kazinform agenttiginiń tilshisi.
Iran Syrtqy ister mınıstrliginiń basshysy óziniń Telegram-kanalynda saparynyń maqsaty Vladımır Pýtınge Irannyń rýhanı kósemi Álı Hameneıdiń jazbasha joldaýyn jetkizý ekenin aıtty.
Reseı prezıdentiniń baspasóz hatshysy Dmıtrıı Peskov Iran Syrtqy ister mınıstrliginiń basshysyna atalǵan joldaýdy prezıdent Pýtınge jetkizýge múmkindik bar dep habarlady.
Osyǵan deıin Iran Islam Respýblıkasynyń elshisi K.Djalalı ekijaqty qarym-qatynastardy damytý, óńirlik yntymaqtastyq pen halyqaralyq arenadaǵy ózara yqpaldastyq máseleleri talqylanatynyn málimdegen bolatyn.
Sondaı-aq, Arakchı reseılik tarappen Tegerannyń ıadrolyq baǵdarlamasy boıynsha ıran-amerıka kelissózderine qatysty jaǵdaıdy talqylaıtyny aıtyldy.
Aıta keteıik, bıylǵy 12 sáýirde Oman astanasynda AQSh prezıdentiniń Taıaý Shyǵystaǵy ókili Stıv Ýıtkoff pen Iran Syrtqy ister mınıstri Abbas Arakchı arasynda janama kelissózder ótken bolatyn.
Ýıtkoff kelissózderdiń oń jáne syndarly ótkenin aıtty.
Arakchı kelissózderdiń syndarly jáne tynysh ótkenine toqtalyp, Oman Syrtqy ister mınıstri Badr ál-Býsaıdıge Iran men Amerıka delegatsııalarynyń pikir almasýyndaǵy talpynystary úshin alǵys aıtyp, Iran men AQSh arasyndaǵy kelissózderdiń ekinshi kezeńi sáýirdiń 19-y kúni ótetinin habarlady.
Kelissózderdiń ekinshi kezeńi qarsańynda Arakchı Irannyń ýrannan bas tartý quqyǵy talqylaýǵa kelmeıtinin aıtty.
Osyǵan deıin Iran MAGATE-niń «antıırandyq» qararyna jaýap qaıtarǵany týraly jazdyq.