Iran radardan jasyryna alatyn ushqyshy joq ushý apparatyn jasap shyǵardy
ASTANA. 11 mamyr. QazAqparat - Iran mamandary radardan jasyryna alatyn ushqyshy joq jańa ushý apparatyn (UJUA) jasap shyǵardy, dep habarlaıdy BNews Rosbalt saıtyna silteme jasaı otyryp.
«Jańa UJUA-ǵa Epic degen ataý berildi. Ol joǵary bıiktikte usha alady, nysandardy kózdeıdi jáne radardan jasyryna alady», - delingen habarlamada.
Eldiń Qarýly kúshteri kúnine arnalǵan parad kezinde sáýir aıynda Iranda jasalǵan áskerı tehnıkanyń úlgileri tanystyrylǵan bolatyn. Olar: ushaq, tikushaq, «jer-jer» jáne «jer-áýe» zymyrandary, artıllerııa men tankiler, oq ótkizbeıtin kólikter, baılanys quraldary, túnde kórý quraldary.
Sol kezde birinshi ret «Sarır» atty ozyq úlgidegi UJUA tanystyrylǵan edi. Iran áskerı qolbasshylyǵynyń aıtýynsha, bul - barlaý júrgizetin jáne soqqy jasaı alatyn, al operatsııalar kezinde radardan kórinbeıtin múmkindigi bar alystan basqarylatyn ushý apparaty.
