Iran prezıdentiniń ushaǵy áýe qorǵanys júıesiniń jumysyna baılanysty baǵytyn ózgertti
ASTANA.KAZINFORM - Iran prezıdenti ushaǵynyń josparsyz baǵyty BAQ betterinde qarama-qaıshy habarlamalar týdyrdy.
Iran BAQ-tarynyń habarlaýynsha, Qyrǵyzstanda ótip jatqan ShYU sammıtinen qaıtqan Iran prezıdenti Masýd Pezeshkıan mingen ushaq Reshttaǵy Sardar-e Djangal halyqaralyq áýejaıyna qondy.
Resht - Kaspıı teńiziniń jaǵalaýyna jaqyn ornalasqan Irannyń soltústigindegi Gılıan provıntsııasynyń ákimshilik ortalyǵy.
Pezeshkıanmen birge Irannyń syrtqy ister mınıstri Abbas Aragchı men sport jáne jastar mınıstri Ahmad Donıamalı de boldy.
Irannyń birneshe BAQ-tary ushaq baǵytynyń ózgerýin shyǵys Tegerandaǵy áýe qorǵanysy júıeleriniń iske qosylýymen baılanystyrdy. Irannyń Mehr aqparat agenttigi 1 qyrkúıektiń keshinde shyǵys Tegeranda áýe qorǵanysy júıeleriniń iske qosylǵanyn habarlady.
Izraıldiń 12-shi arnasy Iran prezıdentiniń ushaǵy shuǵyl qonýǵa májbúr bolǵanyn habarlady.
Iranian President Masoud Pezeshkian's plane was forced to land in Rasht on his return from Kyrgyzstan. - N12.
— Open Source Intel (@Osint613) September 1, 2026
Al, IRNA memlekettik aqparat agenttigi prezıdent ushaǵynyń bul qonýyn tótenshe jaǵdaıǵa balamaı, Qyrǵyzstannan ushyp kele jatqan qysqa aıaldama dep sıpattady.
Agenttiktiń málimetinshe, ushaq Resht áýejaıynda birneshe saǵat aıaldady. Aıaldama kezinde Gılıan provıntsııasynyń gýbernatory Hadı Hakshenas Pezeshkıanǵa eldiń qajetti taýarlarǵa qol jetkizýin qamtamasyz etý sharalary týraly esep berdi.
Gýbernator sonymen qatar prezıdentke provıntsııanyń saýda, kólik jáne logıstıkalyq múmkindikteri jáne Irandy qajetti taýarlarmen qamtamasyz etýdegi róli týraly aqparat berdi.
Iran bıligi prezıdent ushaǵynyń shuǵyl qonýy týraly habarlamalardy áli resmı túrde rastaǵan joq nemese onyń baǵytyn ózgertýi týraly ashyp eshteńe aıtqan joq.
Biz buǵan deıin AQSh birneshe aptadan beri alǵash ret Iranǵa shabýyl jasaǵanyn habarladyq.
