Iran prezıdenti 34 jyldan keıin Mysyrǵa birinshi ret resmı saparmen keldi
ASTANA. 5 aqpan. QazAqparat - Iran prezıdenti Mahmud Ahmadınejad Mysyrǵa resmı saparmen keldi. Bul parsy memleketi basshylarynyń 1979 jyldan bergi perǵaýyndar eline tuńǵysh ret taban tireýi. 34 jyl buryn Irandaǵy Islam tóńkerisinen keıin Mysyr bul elmen dıplomatııalyq qarym-qatynasyn múlde úzgen bolatyn. Dál osy jyly AQSh-tyń Kemp-Devıd qalasynda Mysyr men Izraıl ózara beıbit kelisimge qol qoıdy.
muslim.kz saıtynyń jazýynsha, Mysyr prezıdenti Muhammed Mýrsı ırandyq áriptesin úlken qurmetpen qarsy aldy. Mýrsı óz kezeginde byltyrǵy jyldyń tamyz aıynda Tegeranǵa barǵan edi. Sol sapar kezinde Tegeran men Kaırde eki eldiń elshilikterin ashý týraly kelisimge qol jetkizilgen bolatyn. Iran-Mysyr arasyndaǵy jaqyndyq 2011 jyly Hosnı Múbárákti taǵynan qulatqan «arab kókteminen» keıin jandanyp sala berdi.
Mahmud Ahmadınejad osy jolǵy saparynyń aıasynda Kaırde ótetin Islam Yntymaqtastyǵy Uıymynyń (IYU) sammıtine qatyspaqshy. Sammıt jumysy erteń bastalmaq. Sonymen birge, ol Ál-Azhar ýnıversıtetiniń tóraǵasy jáne meshitiniń bas ımamy, sheıh Ahmed Ál-Taıbpen kezdesedi.
