Iran prezıdenti men Saýd Arabııasynyń taq murageri Taıaý Shyǵystaǵy shıelenisti azaıtýǵa daıyn ekenin málimdedi
ASTANA. KAZINFORM – Eki el de Taıaý Shyǵystaǵy shıelenisterdiń jalǵasýy aıasynda dıalog pen shıelenisti azaıtýǵa daıyn ekenin málimdedi, dep habarlaıdy Kazinform agenttiginiń menshikti tilshisi.
Seısenbi kúni Iran prezıdenti Masýd Pezeshkıan Saýd Arabııasynyń taq murageri Muhammed bın Salmanmen kelissóz ótkizdi. Iran prezıdenti keńsesiniń habarlaýynsha, Pezeshkıan ıslam elderiniń birligi men yntymaqtastyǵy aımaqtyq qaýipsizdikti qamtamasyz etýdiń mańyzdy faktory ekenin aıtty.
Iran prezıdenti aımaqtyq turaqsyzdyq eki tarapqa da zııan keltiretinin atap ótip, qaýipsizdikti buzýǵa baǵyttalǵan psıhologııalyq jáne saıası áreketterdiń qaýpine nazar aýdardy. Sonymen qatar Pezeshkıan Tegeran beıbitshilik pen shıelenisti tómendetýge baǵyttalǵan barlyq protsesti qoldaýǵa daıyn ekenin jetkizip, musylman elderiniń qoldaýyna alǵys bildirdi.
Saýd Arabııasynyń taq murageri Muhammed bın Salman óz kezeginde Iranǵa qarsy kez kelgen agressııaǵa jol bermeıtinin jáne shıelenisti azaıtýǵa basymdyq beretinin aıtty. Koroldiktiń Syrtqy ister mınıstrliginiń málimetinshe, Muhammed bın Salman Er-Rııad Islam Respýblıkasynyń egemendigin qurmetteýge mindettenetinin jáne Saýd Arabııasynyń áýe keńistigi men aýmaǵyn Iranǵa qarsy áskerı áreketter úshin paıdalanýǵa ruqsat bermeıtinin rastady.
Taq murageri sondaı-aq Iranmen jáne basqa aımaq elderimen turaqty beıbitshilik pen qaýipsizdik ornatý maqsatynda yntymaqtastyq jasaýǵa daıyn ekenin jetkizdi.
Bul kelissózder Irannyń Islam revolıýtsııasy gvardııa korpýsynyń eskertýlerinen keıin ótti. Seısenbi kúni Irannyń Áskerı-teńiz kúshteriniń saıası qolbasshysynyń orynbasary Mohammad Akbarzade kórshiles memleketterdiń aýmaǵy, áýe keńistigi nemese sýlary Iranǵa qarsy shabýyl jasaý úshin paıdalanylǵan jaǵdaıda, olardy jaý memleket dep tanıtynyn málimdedi.
Sondaı-aq Iran dıplomatııasy aımaqtaǵy baılanystaryn jalǵastyryp jatyr. Irannyń syrtqy ister mınıstri Abbas Aragchı Qatar premer-mınıstri jáne syrtqy ister mınıstri sheıh Muhammed bın Abdýlrahman bın Djasım ál-Tanımen telefon arqyly sóılesti.
Tasnim agenttiginiń habarlaýynsha, eki tarap aımaqtyq turaqtylyqty saqtaý jáne shıelenisti tómendetý úshin dıplomatııalyq áreketterdi jalǵastyrý qajettigin atap ótip, ekijaqty yntymaqtastyqty keńeıtýge kelisti.
Buǵan deıin Irandaǵy kóshi-qonnyń aýqymdy tolqynynan qaýiptengen Túrkııa bıligi shyǵys shekarasynda býferlik aımaq qurýy múmkin ekenin jazǵanbyz.