Iran men Ázerbaıjan prezıdentteri telefon arqyly sóılesti

ASTANA. KAZINFORM — Masýd Pezeshkıan Irannyń Nahchyvandy atqylaýǵa qatysy joq ekenin málimdedi.

Iran prezıdenti Masýd Pezeshkıan Ázerbaıjan prezıdenti Ilham Álıevpen telefon arqyly sóılesip, Tegerannyń Nahchyvandaǵy eki ushqyshsyz apparat boıynsha bolǵan oqıǵaǵa qatysy joq ekenin aıtty.

Eki el basshynyń áńgimesin Ázerbaıjan prezıdentiniń baspasóz qyzmetine silteme jasaı otyryp TASS agenttigi habarlady.

— 8 naýryzda Iran tarapynyń bastamasymen prezıdentter Masýd Pezeshkıan men Ilham Álıev telefon arqyly sóılesti. Ázerbaıjan basshysy Nahchyvanda bolǵan oqıǵany tergeýdiń mańyzdylyǵyn atap ótti, - delingen habarlamada.

— Óz kezeginde Masýd Pezeshkıan Nahchyvanǵa jasalǵan áýe shabýyly oqıǵasynyń Iranǵa qatysy joq ekenin málimdedi jáne bul jaǵdaı tergeletinin atap ótti, - dep naqtylady baspasóz qyzmeti.

Buǵan deıin Ázerbaıjannyń Nahıchyvanynda pılotsyz ushý apparattary (PUA) apatqa ushyraǵanyn jazǵan bolatynbyz.

BAQ habarlamalaryna sáıkes, oqıǵa Nahchyvan halyqaralyq áýejaıy men oǵan jaqyn ornalasqan aýyldardyń mańynda bolǵan. Drondardyń biri Nahchyvan halyqaralyq áýejaıynyń termınal ǵımaratyna, al ekinshisi Shekerabad aýylyndaǵy mekteptiń mańyna qulaǵan. Oqıǵa saldarynan eki beıbit turǵyn jaraqat aldy.

Aıta keteıik, Prezıdent Qasym-Jomart Toqaev Irannyń ushqyshsyz ushý apparattary Nahchyvan qalasyndaǵy áýejaıdy atqylaýyna baılanysty ustanymyn málimdedi. 

Keıinnen Ázerbaıjan prezıdenti Ilham Álıev Qazaqstan Prezıdenti Qasym-Jomart Toqaevqa Nahchyvan áýejaıyna soqqyny aıyptaǵany úshin alǵys bildirdi.