Iran prezıdenti Makronǵa Izraıl soqqysyn toqtatpaıynsha AQSh-pen kelissóz júrgizbeıtinin aıtty

ASTANA. KAZINFORM - Frantsııa prezıdenti Emmanıýel Makron Iran prezıdenti Masýd Pezeshkıanmen telefon arqyly sóılesti, - dep habarlaıdy VVS.

Makron Irandy «eskalatsııany boldyrmaý úshin barynsha ustamdylyq tanytýǵa» jáne AQSh-pen ıadrolyq kelissózderdi qaıta bastaýǵa shaqyrdy.

Alaıda Pezeshkıan  Izraıldiń Iranǵa qarsy shabýyly jalǵasyp jatqanda kelissózder qaıta bastalmaıtynyn aıtty.

Omannyń aralasýymen Iran men AQSh arasyndaǵy kelissózderdiń taǵy bir raýndy jeksenbige josparlanǵan bolatyn, biraq senbide onyń ótpeıtini belgili boldy.

Eske sala keteıik, juma, 13 maýsymǵa qaraǵan túni Izraıl Iranǵa jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy. Iran Natanzedegi ıadrolyq qondyrǵynyń zaqymdanǵanyn rastady, biraq radıatsııanyń aǵyp ketkenin joqqa shyǵardy.

Iran Izraılge zymyran soqqylarynyń jańa tolqynyn bastady. Izraıldiń Tótenshe jaǵdaılar qyzmeti habarlaǵandaı, ırandyq zymyran atysynan eki adam qaza tapty – shamamen 60 jastaǵy áıel jáne 45 jastaǵy er adam. Taǵy 19 adam jaraqat aldy, dep habarlady Izraıldiń jedel járdem qyzmeti.

Irannyń BUU-daǵy ókili Izraıldiń áýe shabýyly saldarynan 78 adamnyń qaza tapqanyn aıtqan bolatyn. Iranda 320-dan astam adam jaraqat aldy.

Buǵan deıin Iran joǵary shendi áskerı qolbasshylar men jetekshi ǵalymdardyń Izraıl soqqysy saldarynan qaza tapqanyn rastady.

Iran Izraıl shabýylynan keıin Ormýz buǵazyn jabaıyn dep jatyr.

Izraıl Iranǵa taǵy soqqy jasady.

Eýroodaq Izraıl-Iran qaqtyǵysyna qatysty málimdeme jasady.

ShYU elderi Izraıldiń Iranǵa jasaǵan áskerı shabýylyn qatań aıyptady.