Iran prezıdenti MAGATE-men yntymaqtastyqty toqtatý týraly zańdy maquldady

ASTANA. KAZINFORM — Iran prezıdenti Masýd Pezeshkııan Medjlıs qabyldaǵan, Atom energııasy jónindegi halyqaralyq agenttikpen (MAGATE) yntymaqtastyqty toqtatýdy qarastyratyn zańǵa qol qoıdy. Bul týraly Anadolu jazdy.

Iran memlekettik teledıdarynyń habarlaýynsha, Pezeshkııan bul zańnyń 25 maýsymda qabyldanǵanyn málimdedi. Onyń sózinshe, bul sheshim «Izraıl men AQSh-tyń sońǵy shabýyldaryna, sondaı-aq MAGATE-niń bul áreketterdi aıyptaýdan bas tartýyna» jaýap retinde qabyldanǵan.

Qujat úkimetke agenttikpen barlyq yntymaqtastyqty tolyq toqtatýdy mindetteıdi.
Medjlıs ázirlegen zań jobasy 221 depýtattyń biraýyzdan daýys berýimen qabyldanǵan. Onyń sońǵy tarmaqtary da basym daýyspen maquldandy.

Jańa zańǵa sáıkes, MAGATE ınspektorlaryna Iran aýmaǵyna kirýge tyıym salynyp, barlyq tekserý is-sharalary toqtatylady.

Sonymen qatar, úkimetke agenttiktiń bas dırektory Rafael Grossımen de eshqandaı qarym-qatynas jasaýǵa tyıym salynady. Iran bıligi ony «tyńshy» dep atady.
Qujattyń kúshi 1969 jylǵy Vena konventsııasynyń 60-babyna sáıkes eki shart oryndalǵanǵa deıin saqtalady: Irannyń egemendigi, aýmaqtyq tutastyǵy, ıadrolyq nysandary men ǵalymdarynyń qaýipsizdigin qamtamasyz etý, sondaı-aq ıadrolyq qarýdy taratpaý týraly sharttyń (ıAQTSh) 4-tarmaǵyna sáıkes beıbit ıadrolyq energııany paıdalaný quqyǵyna qurmet kórsetý.

Bul sharttardyń oryndalýyn Irannyń Atom agenttigi óz esebinde rastap, Ulttyq qaýipsizdik keńesi maquldaýy tıis.

Úkimet zańnyń oryndalý barysy týraly ár toqsan saıyn Medjlıs pen Qaýipsizdik keńesine esep berýge mindetti.

Buǵan deıin Iran Syrtqy ister mınıstrliginiń resmı ókili Ismaıl Baǵaı Izraıl men AQSh-tyń shabýyldarynan keıin Irannyń Halyqaralyq atom energııasy agenttigimen (MAGATE) yntymaqtastyǵy burynǵydaı jalǵasa almaıtynyn málimdegen edi.