Iran prezıdenti Qazaqstannyń óńirdegi beıbitshilikti nyǵaıtýǵa qosqan úlesin joǵary baǵalady

ASTANA. KAZINFORM — Qazaqstan óńirlik turaqtylyqty qamtamasyz etýde jáne halyqaralyq qaýipsizdikti nyǵaıtýda kún sanap mańyzdy ról atqaryp keledi. Bul týraly Iran Islam Respýblıkasynyń Prezıdenti Masýd Pezeshkıan QR Prezıdentiniń Teleradıokeshenine bergen eksklıýzıvti suhbatynda aıtty.

Iran prezıdenti Qazaqstannyń qarqyndy damýy óńir elderi men jahandyq seriktester arasyndaǵy mádenı, ǵylymı jáne áleýmettik-saıası baılanystardy keńeıtýge jańa múmkindikter ashatynyn atap ótti.

— Qazaqstan qarqyndy damý kezeńinde tur jáne Shyǵys pen Batys, Soltústik pen Ońtústik arasyndaǵy mańyzdy torapqa aınalyp otyr. Jyldam damý mádenı, ǵylymı, kórkem jáne áleýmettik-saıası ózara is-qımyldy kúsheıtýge múmkindik beredi, — dedi Iran kóshbasshysy.

Onyń sózinshe, eger kólik baǵdarlaryn keńeıtip, ózara árekettesýdi tereńdetse, Qazaqstan óńirdiń mádenı ortalyǵyna aınalýy múmkin. Bul óz kezeginde halyqtardyń kózqarasyn jaqyndatyp, beıbitshilikti nyǵaıtady jáne damýdy jedeldetedi.

— Bizdiń kásipkerler, ınvestorlar, ǵalymdar jáne mádenıet qaıratkerleri baılanystardy áldeqaıda ońaı ornata alady. Qazaqstan, Iran jáne óńirdiń basqa da elderi ilgeri shyqqan ózge memleketterden esh kem emes dep bilemin. Sondyqtan bir-birimizge kómektese otyryp, zor jetistikterdiń nátıjesin kóremiz, — dedi Pezeshkıan. 

Suqbattyń tolyq nusqasyn myna siltemeden oqı alasyz.