Iran Prezıdenti: Qazaqstan – aımaqtaǵy mańyzdy seriktesimiz
ASTANA. KAZINFORM — Iran Ortalyq Azııa óńirimen tatý kórshilik qarym-qatynasqa aıryqsha mán beredi. Bul týraly Aqordada Memleket basshysy Qasym-Jomart Toqaevpen kelissózder qorytyndysyna oraı BAQ ókilderine arnalǵan birlesken málimdeme barysynda Iran Islam Respýblıkasynyń Prezıdenti Masýd Pezeshkıa aıtty.
Iran Prezıdenti Qazaqstanǵa saparmen kelýge shaqyryp, qonaqjaılyq tanytqany úshin Qasym-Jomart Toqaevqa rızashylyǵyn bildirdi
– Iran Ortalyq Azııa óńirimen tatý kórshilik qarym-qatynasqa aıryqsha mán beredi. Qazaqstan – aımaqtaǵy mańyzdy seriktesimiz ári Kaspıı teńizi arqyly shektesetin kórshimiz. Joǵary mártebeli Prezıdent Qasym-Jomart Toqaevpen ózekti máseleler jóninde pikir almastyq. Biz kóptegen baǵyttaǵy, atap aıtqanda, aýyl sharýashylyǵy, óndiris, taý-ken, kólik-logıstıka, ǵylym, mádenıet, jańa tehnologııalar salalaryndaǵy birlesken jobalardy talqyladyq.
Kelissózderdiń nátıjesin taıaý keleshekte kóremiz dep oılaımyn. Halyqaralyq máseleler boıynsha eki eldiń ustanymdary ortaq, – dedi Masýd Pezeshkıan.
Sonymen qatar ol ál-Farabı murasy eki elge de ortaq ekenine nazar aýdartty. Ál-Farabıdi Qazaqstan men Iran arasyndaǵy mádenı baılanystardyń alyp báıteregi dep baǵalady.
Buǵan deıin Qazaqstan-Iran qazaq jerinde ál-Farabı murasyna arnalǵan keshendi birlesip salatynyn jazǵan edik.