Iran prezıdenti: qarýly qaqtyǵysty toqtatýdyń jalǵyz joly — oq atýdy doǵarý
STAMBUL. KAZINFORM — Izraıldiń agressııasyn toqtatý — Iran men Izraıl arasyndaǵy qaqtyǵysty aıaqtaýdyń jalǵyz joly. Bul týraly Iran prezıdenti Masýd Pezeshkıan málimdedi, dep jazdy Anadoly.
Onyń aıtýynsha, Izraıl sondaı-aq agressııany qaıtalamaýǵa kepildik berýi tıis.
— Biz árdaıym beıbitshilik pen turaqtylyqqa umtylyp keldik. Alaıda qazirgi jaǵdaıda bul bizge tańylǵan soǵysty toqtatýdyń jalǵyz joly — qarsylastyń agressııany tolyq toqtatýy jáne sıonıstik terrorısterdiń avantıýrasyna birjola shek qoıatyn naqty kepildiń berilýi, — dep jazdy saıasatker áleýmettik jelide (X platformasynda).
Prezıdent eger bul talap oryndalmasa, Irannyń jaýǵa beretin jaýaby «qatań ári aýyr» bolatynyn eskertti.
Qaqtyǵystyń órshýi: Izraıldiń soqqylary men Irannyń jaýaby
2025 jyly 13 maýsymda Izraıl Irannyń ártúrli qalalarynda ornalasqan ıadrolyq nysandar men joǵarǵy áskerı basshylyqtyń mekenjaılaryna keń aýqymdy shabýyl jasady.
Atalǵan soqqylar nátıjesinde Iran Qarýly Kúshteri Bas shtabynyń bastyǵy, Islam revolıýtsııasy saqshylar korpýsynyń bas qolbasshysy, birneshe joǵary laýazymdy áskerı tulǵalar jáne ıadrolyq zertteýlermen aınalysqan toǵyz maman qaza tapty.
Iran úkimetiniń málimeti boıynsha, 585 adam qaza taýyp, 1300-den astam adam jaralanǵan.
Jaýap retinde Iran Izraıl aýmaǵyna ballıstıkalyq zymyrandarmen soqqy berdi. Resmı derekterge súıensek, bul shabýyl kezinde 24 adam qaza tapty, 500-den astam adam jaralandy.
Halyqaralyq qaýymdastyq tarapynan, sonyń ishinde Túrkııa da, Izraıldiń áreketin qatań aıyptady.
Eske sala keteıik, buǵan deıin BUU bas quqyq qorǵaýshysy Iran men Izraıldi gýmanıtarlyq zańdardy saqtaýǵa shaqyrǵanyn jazǵan edik.