Iran prezıdenti eldiń qýatty bolýy nege baılanysty ekenin aıtty
ASTANA. KAZINFORM – Iran prezıdenti Masýd Pezeshkıan eldiń turaqty damýy men ulttyq múddelerin qorǵaýdyń basty sharty qoǵamdaǵy birlik pen yntymaq ekenin málimdedi, dep habarlaıdy IRNA.
Memleket basshysy bul týraly Ulttyq balalar aptalyǵyna oraı uıymdastyrylǵan «Otan kúlkisi» atty festıvalde aıtty.
Іs-shara barysynda Pezeshkıan balalarǵa birliktiń mańyzyn túsindirý úshin bir býma shybyq týraly mysal keltirdi. Onyń aıtýynsha, jeke turǵan shybyqty syndyrý ońaı bolǵanymen, bir býmaǵa biriktirilgen shybyqtardy syndyrý áldeqaıda qıyn. Sol sııaqty yntymaǵy jarasqan qoǵam da syrtqy qysymǵa tótep bere alady.
– Eger biz biriksek, eshkim bizdi jeńe almaıdy. Al árqaısymyz jeke áreket etsek, bizdi álsiretý ońaı bolady. Sondyqtan bir-birimizge kómektesip, árdaıym qoldaý kórsetýimiz kerek. Sonda ǵana barlyq salada damýǵa qabiletti qýatty Irandy qura alamyz, – dedi Masýd Pezeshkıan.
Iran prezıdenti kúsh-jigerdi biriktirý tek qoǵamdyq ómirde ǵana emes, ǵylym, áleýmettik qyzmet jáne gýmanıtarlyq yntymaqtastyq salalarynda da mańyzdy ekenin atap ótti.
Onyń pikirinshe, eldiń bolashaǵy qoǵamnyń barlyq ókiliniń ortaq maqsat jolynda jumyla áreket etýine baılanysty.
Prezıdenttiń bul málimdemesi otbasyn qoldaýǵa jáne jas urpaqtyń damýyna baǵyttalǵan memlekettik is-sharalar aıasynda jasaldy.
Aıta keteıik, buǵan deıin Masýd Pezeshkıan Irandaǵy aza tutý rásimine qatysqan mıllıondaǵan azamatqa alǵys aıtyp, halyqtyń yntymaǵy men ulttyq birliginiń mańyzyn atap ótken bolatyn.
