Iran prezıdenti AQSh pen Izraıldiń Gazadaǵy áreketin genotsıd dep atady
ASTANA. KAZINFORM – Iran prezıdenti Masýd Pezeshkıan Gaza sektorynda AQSh-tyń tikeleı qoldaýymen jasalyp jatqan áreketterdi genotsıd jáne adam quqyqtaryn óreskel buzý dep baǵalady, dep habarlaıdy IRNA.
Iran basshysy bul týraly 12 qazanda Dúnıejúzilik poshta kúnine arnalǵan is-sharada málimdedi.
Pezeshkıan azamattyq ınfraqurylym men aýrýhanalarǵa jasalǵan soqqylardy, áıelder, balalar jáne qart adamdardyń qaza tabýyn eshqandaı áskerı maqsatpen aqtaýǵa bolmaıtynyn atap ótti.
– Qazir Gazada AQSh-tyń qatysýymen bolyp jatqan jaǵdaı – naǵyz genotsıd. Adam quqyqtaryn qorǵaıtynyn málimdeıtin elder bolyp jatqan oqıǵalarǵa kóz jumyp qana qoımaı, qarý-jaraq jetkizý arqyly bul qylmystarǵa jol berip otyr. Osyndaı jaǵdaıda olardyń adam quqyqtary týraly aıtýy uıat, – dedi Iran prezıdenti.
Onyń aıtýynsha, beıbit turǵyndardy berilýge májbúrleý maqsatynda sý men azyq-túlikke qoljetimdilikti shekteý saıasaty Batys derjavalarynyń aımaqtaǵy resýrstardy baqylaýǵa alýǵa baǵyttalǵan shynaıy maqsatyn kórsetedi.
Iran basshysynyń málimdemesi Taıaý Shyǵystaǵy gýmanıtarlyq daǵdarysqa qatysty halyqaralyq talqylaýlar jalǵasyp jatqan tusta jasaldy.
Aıta keteıik, buǵan deıin BUU Gaza sektoryn qalpyna keltirý jáne qaıta qurý úshin 71,5 mlrd dollar qajet ekenin málimdegen bolatyn. Uıymnyń baǵalaýynsha, ınfraqurylymǵa keltirilgen tikeleı zalal 35,2 mlrd dollarǵa jetken.
