Iran porttaǵy jarylysqa zymyran otynynyń qatysyn joqqa shyǵardy
ASTANA. KAZINFORM – Tegeran Irannyń eń iri portynda qatty zymyran otynynyń negizgi quramdas bóligin óndirýge paıdalanylǵan zat jaryldy degen aqparatty joqqa shyǵardy, dep habarlaıdy DW aqparat agenttigi.
Iran bıligi ondaǵan adamnyń ómirin qıǵan Irannyń eń iri saýda portyndaǵy jarylys hımııalyq zattardy abaısyz qoldaný saldarynan bolǵanyn jáne onyń zymyran otynyna esh qatysy joq ekenin habarlady, dep jazdy BAQ. Bul týraly jeksenbi, 27 sáýir kúni eldiń Qorǵanys mınıstrligi jarııalap, mundaı habarlamalar «Iran dushpandarynyń yqpalynda» paıda bolǵanyn basa aıtty.
Qorǵanys mınıstrliginiń málimdemesinde Bender-Abbas qalasyndaǵy Shahıd-Radjaı porty aımaǵynda áskerı júkter bolmaǵany, biraq jarylystyń naqty sebebin áli anyqtaý kerek ekeni aıtylǵan.
Jergilikti bıliktiń málimetinshe, órt sóndirýshiler órttiń 90 paıyzǵa jýyǵyn sóndirdi, jaǵdaı baqylaýǵa alyndy.
40 adam qaza taýyp, 1200 adam jaraqat aldy
27 sáýir kúni keshke memlekettik BAQ-ta jarııalanǵan sońǵy aqparatqa sáıkes portta bir kún buryn bolǵan kúshti jarylys saldarynan keminde 40 adam qaza taýyp, 1200 adam jaraqat alǵan.
New York Times gazeti aılaqta ballıstıkalyq zymyrandarǵa arnalǵan qatty otynnyń negizgi ıngredıenti – natrıı perhloraty jarylǵanyn habarlady.
Janarmaı rezervýarynyń jarylýy
Tasnim aqparat agenttigi portta janarmaı suıyq qoımasynyń jarylǵanyn habarlady. Biraq Irannyń munaı óńdeý jáne taratý ulttyq kompanııasy jarylystyń munaı óńdeý zaýyttary, janarmaı tsısternalary, taratý kesheni men munaı qubyrlaryna qatysy joq ekenin túsindirdi.
Irannyń Tótenshe jaǵdaılardy basqarý agenttiginiń baspasóz hatshysy Hoseın Zafarı málimdegendeı, aldyn ala tergeý apattyń janǵysh jáne hımııalyq materıaldary bar konteınerdegi jarylys nemese órt saldarynan bolǵanyn kórsetti. Tasnim málimetinshe, jarylys tolqynynyń kúshti bolǵany sonsha, epıtsentrge jaqyn ornalasqan ákimshilik ǵımaratty tolyǵymen qırap, aýdandaǵy kóptegen kólik órtenip ketti.
Eske sala ketsek, 26 sáýirde Irannyń ońtústigindegi portta joıqyn jarylys boldy.
Qaıǵyly oqıǵaǵa baılanysty Memleket basshysy Iran Prezıdentine kóńil aıtý jedelhatyn joldady.
Sonymen qatar Irannyń jarylys bolǵan portynyń Qazaqstan úshin mańyzy qandaı ekeni naqtylandy.