Iran portyndaǵy jarylystan qaza tapqandar sany 36 adamǵa jetti
ASTANA. KAZINFORM – Irannyń Bender-Abbas qalasyndaǵy Shahıd-Radjaı portynda bolǵan jarylystan qaza tapqandar sany 36 adamǵa jetti. Bul týraly Iran Densaýlyq saqtaý mınıstrligine silteme jasaı otyryp «Al-Masıra» telearnasy habarlady.
Jarylys 26 sáýir kúni bolǵan. Onyń dybysy jarylys ornynan 26 shaqyrym qashyqtyqtaǵy Keshm aralynda da estilgen. Shahıd-Radjaı porty – Irannyń eń iri porttarynyń biri, el arqyly ótetin tranzıttik júkterdiń basym bóligi osy port arqyly tasymaldanady. Jarylystan keıin porttyń jumysy ýaqytsha toqtatyldy.
Jarylystyń sebebi resmı túrde jarııalanǵan joq. Alaıda buqaralyq aqparat quraldarynyń habarlaýynsha, jarylys zymyran otynynyń negizgi komponenti — natrıı perhloraty sebep bolýy múmkin degen boljam bar.
Aıta keteıik, buǵan deıin Shahıd-Radjaı portyndaǵy jarylystan 1139 adam zardap shekkenin jazdyq.
Qaıǵyly oqıǵaǵa baılanysty Memleket basshysy Iran Prezıdentine kóńil aıtý jedelhatyn joldady.
Sonymen qatar Irannyń jarylys bolǵan portynyń Qazaqstan úshin mańyzy qandaı ekeni naqtylandy.