Iran Parsy shyǵanaǵynda eki tankerdi ustap aldy
ASTANA. KAZINFORM — Irannyń quqyq qorǵaý organdaryna Parsy shyǵanaǵynda Islam revolıýtsııasy saqshylar korpýsy (IRSK) ustaǵan eki tankerdiń 15 ekıpaj múshesi tapsyryldy. Tegerannyń nusqasy boıynsha, bul kemeler «bir mıllıon lıtrden astam kontrabandalyq otyn» tasymaldaǵan. Bul týraly Irannyń Tasnim aqparat agenttigi habarlady.
Iran Qarýly kúshteriniń elıtalyq bólimsheleri sanalatyn Islam revolıýtsııasy saqshylar korpýsynyń áskerı-teńiz kúshteri Parsy shyǵanaǵynda sheteldik ekıpajdary bar eki munaı tankerin ustady.
Iran tarapynyń aıtýynsha, kemeler «bir mıllıon lıtrden astam kontrabandalyq otyn» tasymaldaǵan. Qazirgi tańda ekıpaj músheleriniń azamattyǵy men tankerlerdiń qaı eldiń týy astynda júzgeni týraly aqparat jarııalanǵan joq.
Jalpy sany 15 ekıpaj múshesi Irannyń quqyq qorǵaý organdaryna tapsyryldy, olar sot aldynda jaýap beredi.
Aıta keteıik, Irandaǵy janarmaı baǵasy álemdegi eń tómen baǵalardyń biri sanalady, bul otyndy basqa elderge zańsyz tasymaldaýdy asa tabysty kásipke aınaldyryp otyr.
Iran katerleri AQSh tankerin basyp alýǵa tyrysty
Buǵan deıin, 3 aqpanda Reuters agenttigi men The Wall Street Journal gazeti Irannyń alty qarýly kateri Ormýz buǵazynda AQSh týy astynda júzip kele jatqan Stena Imperative tankerine jaqyndaǵanyn habarlaǵan edi. Oqıǵa Omannyń soltústiginen shamamen 30 shaqyrym jerde bolǵan.
Iran katerlerinen tanker ekıpajyna qozǵaltqyshty toqtatyp, kemeni basyp alýǵa daıyndalý týraly buıryq berilgen. Alaıda Stena Imperative jyldamdyǵyn arttyryp, qozǵalysyn jalǵastyrǵan, keıinnen AQSh áskerı kemesiniń ilesip júrýimen qaýipsiz aımaqqa shyqqan.
Ormýz buǵazy Parsy shyǵanaǵyn Oman shyǵanaǵymen, Arab teńizimen jáne Úndi muhıtymen baılanystyrady. Bul teńiz joly arqyly álemdik munaı óndirý kóleminiń shamamen besten biri tasymaldanady. 2025 jylǵy maýsym aıynda Islam revolıýtsııasy saqshylar korpýsynyń áskerı-teńiz kúshteri qolbasshylyǵynyń ókili AQSh tarapynan shabýyl jasalǵan jaǵdaıda Ormýz buǵazyn jabamyz dep qoqan-loqqy bildirgen.
Eske sala keteıik, Iran men AQSh arasyndaǵy ıadrolyq baǵdarlama boıynsha kelissózder Oman astanasy Maskat qalasynda ótedi. Kezdesý juma kúnine josparlanǵan jáne jergilikti ýaqyt boıynsha shamamen saǵat 10:00–de (Grınvıch ýaqytymen 06:00–de) bastalýy tıis.