Iran Parsy shyǵanaǵy elderiniń energetıkalyq ınfraqurylymyna soqqy jasaýy múmkin ekenin eskertti
ASTANA. KAZINFORM — AQSh pen Iran arasyndaǵy shıelenistiń kúsheıýi aıasynda Tegeran Parsy shyǵanaǵy elderine jańa eskertý jasady, dep habarlaıdy Kazinform agenttiginiń Taıaý Shyǵystaǵy menshikti tilshisi.
Reuters agenttiginiń bes derekkózine súıengen málimetine sáıkes, Iran AQSh óz aýmaǵyna taǵy da soqqy jasaıtyn bolsa, aımaqtaǵy strategııalyq mańyzy bar energetıkalyq ınfraqurylym nysandaryna jaýap retinde soqqy beretinin málimdegen.
Agenttik málimetinshe, bul eskertý AQSh prezıdenti Donald Tramptyń 28 shildede Irannyń energetıkalyq ınfraqurylymyna soqqy berý múmkindigin joqqa shyǵarmaǵan málimdemesinen keıin júrgizilgen dıplomatııalyq baılanystar barysynda jetkizilgen.
Habarlanǵandaı, Irannyń syrtqy ister mınıstri Abbas Arakchı Saýd Arabııasy, Qatar jáne Túrkııadaǵy áriptesterimen, sondaı-aq Pákistan armııasy shtabynyń basshysymen kelissózder ótkizgen. Kezdesýler barysynda ol AQSh-tyń seriktesterin Vashıngtonǵa yqpal etip, áskerı operatsııalardyń qaıta bastalýyna jol bermeýge shaqyrǵan.
Tegeran shabýyl jasalǵan jaǵdaıda jaýap soqqylary AQSh-tyń áskerı nysandaryna ǵana emes, Parsy shyǵanaǵy elderiniń energetıkalyq ınfraqurylymyna da baǵyttalýy múmkin ekenin eskertken.
Eskertý aımaqtaǵy barlyq memleketke arnalsa da, negizinen Saýd Arabııasy men Qatar arqyly jetkizilgen.
Agenttik derekkózderiniń málimetinshe, budan keıin Saýd Arabııasynyń taq murageri Muhammed ben Salman Donald Tramppen jaǵdaıdy talqylap, shıelenisti ýshyqtyrmaýǵa, yqtımal soqqylardy keıinge qaldyrýǵa jáne kelissózderge qaıta oralýǵa shaqyrǵan. Sonymen qatar Er-Rııad koroldik aýmaǵyna shabýyl jasalǵan jaǵdaıda áskerı jaýap berýge daıyn ekenin jetkizgen.
Aqparatqa sáıkes, yqtımal nysandar qatarynda munaı ken oryndary, munaı óńdeý zaýyttary, elektr jelileri, sýmen jabdyqtaý nysandary jáne Parsy shyǵanaǵy elderiniń kólik ınfraqurylymy bolýy múmkin.
Buǵan deıin Iran men Oman Ormýz buǵazy arqyly kemelerdiń júrý baǵyty jóninde kelisimge kelgeni habarlanǵan edi. Óz kezeginde Donald Tramp pen AQSh Qarjy mınıstrliginiń basshysy Ormýz buǵazynyń jaqyn arada qaıta ashylýy múmkin ekenin málimdegen.
