Iran Parsy shyǵanaǵy ataýyn burmalaǵany úshin Google-dy sotqa bermek

ASTANA. KAZINFORM – Tegeran amerıkalyq IT kompanııasyn mádenı biregeılikke nuqsan keltirdi dep aıyptap, sottyń isti qaraýyna daıyn ekenin málimdedi.

Irannyń Vırtýaldy keńistik ulttyq ortalyǵy óz qyzmetterinde «Parsy shyǵanaǵy» tarıhı ataýyn burmalaǵany úshin Google-ǵa qarsy sot isin júrgizý nıeti týraly habarlady.

Quqyqtyq jáne parlamenttik máseleler ortalyǵy basshysynyń orynbasary Mohammad-Sadek Farahanı Google-dyń áreketin aıyptap, «Parsy shyǵanaǵy» ataýyn burmalaý Irannyń mádenı sáıkestigin buzý ekenin basa aıtty.

- Eldiń kıberkeńistigine baqylaý jasaıtyn organ retinde biz Irannyń mádenı sáıkestigin qorǵaýdy jáne qajetti sharalardy qabyldaýdy óz mindetimiz dep sanaımyz, - dep málimdedi Farahanı senbi kúni.

Ol ortalyq úsh baǵytta áreket etýdi josparlap otyrǵanyn atap ótti: halyqaralyq uıymdarda resmı túrde narazylyq bildirý, halyqaralyq sottar men trıbýnaldarǵa shaǵymdaný, sondaı-aq Syrtqy ister mınıstrligimen jáne sot júıesimen birlesip ulttyq sottarǵa shaǵym túsirý.

Farahanı «Parsy shyǵanaǵy» ataýyn burmalaý Irannyń tarıhı jáne mádenı murasyna nuqsan keltirý áreketi retinde qabyldanatynyn atap ótti.

Google bul másele boıynsha áli resmı túsinikteme bergen joq.

Buǵan deıin ırandyq parlamentshiler de Parsy shyǵanaǵynyń ataýyn ózgertý áreketterine alańdaýshylyq bildirip, onyń el úshin tarıhı jáne geosaıası mańyzdylyǵyn atap ótken.

Bul Irannyń halyqaralyq aqparat kózderinde Parsy shyǵanaǵy úshin balama ataýlardyń qoldanylýyna narazylyq bildirgen birinshi jaǵdaı emes. El halyqaralyq qatynastarda tarıhı dáldik pen mádenı biregeılikti dáıekti túrde qorǵap keledi.

7 mamyrda Iran Syrtqy ister mınıstri Abbas Arakchı Parsy shyǵanaǵynyń tarıhı ataýyn ózgertý áreketiniń saıası astary bar jáne Tegeran ony dushpandyq qımyl retinde qabyldaıtynyn málimdedi.

- Bul jaı ǵana geografııanyń máselesi emes. Bul búkil Iran halqynyń ulttyq bolmysyna nuqsan keltirip, qadir-qasıetin qorlaý áreketi, - dep jazdy Arakchı X áleýmettik jelisinde.

The name Persian Gulf, like many geographical designations, is deeply rooted in human history. Iran has never objected to the use of names such as the Sea of Oman, Indian Ocean, Arabian Sea, or Red Sea. The use of these names does not imply ownership by any particular nation, but… pic.twitter.com/PQjUiph4qt

— Seyed Abbas Araghchi (@araghchi) May 7, 2025

Ol Parsy shyǵanaǵy ataýynyń ǵasyrlar boıy tarıhı, dıplomatııalyq jáne kartografııalyq derekkózderde saqtalǵanyn basa aıtty.

Mınıstr reaktsııasyn Associated Press agenttiginiń amerıkalyq sheneýnikterge silteme jasaı otyryp, AQSh prezıdenti Donald Tramp Er-Rııadqa sapary kezinde jalpy qabyldanǵan «Parsy shyǵanaǵy» termıniniń ornyna «Arab shyǵanaǵy» termınin qoldanýǵa kóshetinin resmı túrde jarııalaýy múmkin dep habarlaǵannan keıin bildirdi.